उत्तर प्रदेशच्या गोरखपूरमध्ये पती, पत्नी आणि तो यांचं एक धक्कादायक प्रकरण समोर आलं आहे. इथे पतीने पत्नीच्या अनैतिक संबंधाला कंटाळून तिची हत्या केली. इतकंच नाही तर हत्या केल्यावर आरोपी स्वत: पोलिसांकडे गेला आणि त्याने आपला गुन्हा कबूल केला. आरोपीने पत्नीचे अनैतिक संबंध होते असंही त्यांना सांगितलं.
पत्नीच्या अनैतिक संबंधामुळे दोघांमध्ये नेहमीच भांडण होत होतं. धक्कादायक बाब म्हणजे महिलेचं तिच्या मुलाच्या वयाच्या तरूणासोबत अफेअर सुरू होतं. हे समजल्यावर पतीने पत्नीला समजावण्याचा प्रयत्न केला आणि तरूणासोबतचा संबंध तोडण्यास सांगितलं होतं. पण तरीही महिलेने काही ऐकलं नाही. त्यासोबतच पोलिसांनी देखील यावर महिलेची समजूत काढली होती. पण या सगळ्यानंतरही महिलेचं अफेअर सुरूच होतं. अशात पती पत्नीच्या या वागण्याला वैतागला आणि त्याने गळा दाबून तिची हत्या केली.
खुर्रमपुर भागातील ही घटना आहे. इथे राहणारा शरदचंद्र पाल आधी स्कूल बस चालवत होता. पण काही वर्षाआधी त्याने घरात किराण्याचं दुकान सुरू केलं. परिवारात शरदचंद्र त्याची पत्नी नीलम पाल(47) एक मुलगा आणि मुलगी आहे. मुलगी पदवीचं शिक्षण घेत आहे. तर मुलगा 10व्या वर्गात आहे. घराच्या दुसऱ्या मजल्यावर भाडेकरू राहतात.
आरोपी पतीनुसार, त्याच्या पत्नीचं एका तरूणासोबत अफेअर सुरू होतं. तरूणी त्याच्या पत्नीच्या साधारण 25 वर्ष लहान आहे. अनेकदा त्याने पत्नी आणि तरूणाला रंगेहाथ पकडलं होतं. दोघांनाही त्याने अनेकदा शांतपणे समजावून सांगितलं होतं. पण दोघांनीही काही ऐकलं नाही. इतकंच नाही तर पोलिसांनीही हा वाद मिटवण्याचा प्रयत्न केला होता. पण नीलम आणि तरूण वेगळे झाले नाही. शरदचंद्र यामुळे फार वैतागला होता. त्यामुळे त्याने पत्नीची हत्या केली.