मुंबई - विधानसभा निवडणुका तोंडावर असताना राज्यातील गुन्हेगारी घटनांमध्ये वाढ झाल्याचं दिसून येते. मुंबईतील अजित पवार यांच्या राष्ट्रवादीचे भायखळा तालुकाध्यक्ष सचिन कुर्मी यांच्यावर काही अज्ञातांनी जीवघेणा हल्ला केला. या हल्ल्यानंतर त्यांना तातडीने जवळच्या रुग्णालयात उपचारासाठी नेले मात्र तिथे त्यांचा जीव गेला. या घटनेनं भायखळा इथं खळबळ माजली आहे.
भायखळा इथं राष्ट्रवादी अजित पवार गटाचं काम करणारे तालुकाध्यक्ष सचिन कुर्मी यांच्यावर रात्री काही अज्ञातांनी धारदार शस्त्राने हल्ला केला. भायखळा परिसरातील म्हाडा कॉलनीच्या मागे ही घटना घडली. या घटनेची माहिती मिळताच पोलीस घटनास्थळी पोहचले त्यांनी जागेचा पंचनामा केला. रात्री दहा ते बाराच्या सुमारास कुर्मी यांच्यावर हल्ला करण्यात आला. पोलीस जेव्हा इथं पोहचले तेव्हा सचिन कुर्मी गंभीर अवस्थेत जखमी झाले होते. त्यांना पोलिसांच्या वाहनातून जेजे रुग्णालयात उपचारासाठी नेले मात्र डॉक्टरांकडून त्यांना मृत घोषित करण्यात आले.
सध्या या घटनेचा पोलीस तपास करत आहेत. नेमकं सचिन कुर्मी यांचा कुणाशी वाद होता का, ही हत्या का करण्यात आली या सर्व प्रश्नांची उत्तरे पोलीस शोधण्याचा प्रयत्न करत आहेत. सचिन कुर्मी हे भुजबळांचे समर्थक होते. या घटनेनंतर राष्ट्रवादी मुंबई अध्यक्ष समीर भुजबळ हे नाशिकहून मुंबईच्या दिशेने रवाना झालेत. आज समीर भुजबळ हे कुर्मी कुटुंबियांची भेट घेऊन त्यांचे सांत्वन करणार आहेत.