- मनीषा म्हात्रे
मुंबई : लग्नाची भेट म्हणून काकीकडून कतारचे हनीमून पॅकेज मिळाले. दोघेही आनंदात कतारसाठी रवाना झाले. मात्र हे हनीमून पॅकेज त्यांचे आयुष्य बदलवेल याची पुसटशी कल्पना या दोघांनाही नव्हती. कतार विमानतळावर तपासणीत या दाम्पत्याजवळील पार्सलमध्ये ४ किलो चरस आढळल्याने दोघांनाही अटक झाली. याच गुन्ह्यात दाम्पत्याला १० वर्षाची शिक्षा सुनाविण्यात आली. कारागृहातच मुलीला जन्म दिला. विनाकारण शिक्षा भोगत असताना तब्बल वर्षभराने त्यांना अडकविणाऱ्याचा पर्दाफाश झाला आणि आता या दाम्पत्याला पुन्हा भारतात आणण्यासाठी केंद्रीय अंमली पदार्थ नियंत्रण विभागाने (एनसीबी) प्रयत्न सुरु केले आहेत. एखाद्या हिंदी चित्रपटाप्रमाणे वाटणारी ही घटना मुंबईच्या मोहम्मद शरीक कुरेशी आणि त्यांची पत्नी ओनिबा कुरेशी या दाम्पत्यासोबत घडली आहे.
मुंबईकर असलेले कुरेशी दाम्पत्य उच्चशिक्षित आहे. गेल्या वर्षीच्या ६ जुलै रोजी कतारच्या दोहा आंतरराष्ट्रीय विमानतळावर ४ किलो चरससह या दाम्पत्याला पकडण्यात आले. या गुन्ह्यात त्यांना १० वर्षाची शिक्षा सुनाविण्यात आली. विशेष म्हणजे, या काळात ओनीबा ही ३ महिन्याची गर्भवती होती. आपल्या मुलगी आणि जावयाला अडकवण्यात आल्याचा विश्वास असल्याने २७ सप्टेंबर रोजी ओनीबाचे वडील शकील अहमद कुरेशी यांनी एनसीबीकडे धाव घेत आपली मुलगी आणि जावई निर्दोष असून त्यांना यात अडकवल्याची तक्रार दिली.
शकील यांनी नातेवाईक तबसुम रियाज कुरेशी आणि तिचा साथीदार निझाम कारा यांच्यामुळे ते यात अडकल्याचा दाट संशय व्यक्त केला होता. तबसुमने त्यांना लग्नाची भेट म्हणून कतारचे हनीमुन पॅकेज दिले. सोबत कतारच्या नातेवाईकांकडे देण्यासाठी एक पार्सल सोबत दिल्याचेही शकील यांनी दिलेल्या तक्रारीत नमूद केले. कतारला नवीन सीमकार्ड घ्यावे लागणार असल्याने तेथेच साधा फोन विकत घेणार असल्याने ठरवत दोघांनी त्यांचे मोबाईल घरीच ठेवले. याच मोबाईलमध्ये तबसुम, निझाम कारा यांच्यातील संवादाचे रेकॉर्डिंग कुरेशी यांनी एनसीबीकडे दिले आहे.
कुरेशी यांच्या याच तक्रारीच्या आधारे एनसीबीचे क्षेत्रीय उपसंचालक के.पी.एस मल्होत्रा यांनी याप्रकारणाचा तपास सुरु केला. २२ डिसेंबर रोजी मुंबई पोलिसांनी दाखल केलेल्या गुह्यांत निझाम कारा आणि तबसुमला १३ ग्रम कोकेनसह अटक केली. तर दुसरीकडे एनसीबीने ड्रग्ज रँकेट प्रकरणात १ किलो ४७४ किलो चरसच्या तस्करीत वेद राम, महेश्वर, शाहनवाज गुलाम चोराटवाला आणि शबाना चोराटवाला यांना बेडया ठोकल्या. त्यांच्या तपासात निझाम कारा आणि त्याची पत्नी शाहिदाने शाहनवाज आणि शबानाला ही ड्रग्ज दिल्याचे समोर आले. यासाठी निझामच्या सांगण्यावरून त्याच्या पत्नीने हे पैसे पुरविल्याचे स्पष्ट झाले होते.
७ सप्टेंबर रोजी निझामला बेल मिळताच एनसीबीच्या पथकाने सापळा रचून त्याच्यावर लक्ष ठेवले. अखेर १४ ऑक्टोबर रोजी निझाम कारा आणि शाहिदा त्यांच्या हाती लागले. त्यांच्या चौकशीत त्यांनीच तबसुम मार्फ़त कुरेशी दाम्पत्याला यात अडकवल्याचे स्पष्ट झाले. आणि चरसची बँग सोबत सोपवली. सध्या हाच धागा पकड़ून एनसीबी पथक कतार दुतावासाच्या मदतीने या जोडप्याच्या सुटकेसाठी प्रयत्न करत आहेत.
चिमुकली झाली १ वर्षाची यात कारागृहात जन्मलेली त्यांची मुलगी अयात एक वर्षाची झाली आहे. ती सध्या कतारमध्येच असल्याचे मल्होत्रा यांनी सांगितले.