पत्नीची हत्या करून उत्तर प्रदेशात पळण्याच्या तयारीत असलेल्या पतीस अटक 

मृत अज्ञात महिलेच्या डोक्यावर कोणत्यातरी जड वस्तूने प्रहार करून तिची हत्या केल्याचे निदर्शनास आले.

ठळक मुद्देकक्ष ६ ने गोवंडी, शिवाजीनगर, मानखुर्द, देवनार आणि ट्रॉम्बे या परिसरात ५ वेगवेगळी पथके रवाना करून जलद गतीने तपास केला. मृत महिलेचा पती उत्तर प्रदेशातील मूळ गावी पळून जाण्याच्या तयारीत असताना पोलीस त्याच्या मुसक्या आवळल्या.

मुंबई - ५ सप्टेंबरला सकाळी ७.४० वाजताच्या सुमारास सायन - ट्रॉम्बे रोडवर २० ते २५ वयोगटातील अज्ञात महिलेचा मृतदेह आढळून आल्याबाबत पोलीस नियंत्रण कक्षाकडून मानखुर्द पोलिसांना माहिती देण्यात आली होती. या घटनेचे गांभीर्य लक्षात घेऊन गुन्हे शाखा कक्ष ६ ने अधिक तपास सुरु केले. त्यानंतर राजावाडी रुग्णालयात भेट देणाऱ्या पथकाने केलेल्या चौकशीत मृत अज्ञात महिलेच्या डोक्यावर कोणत्यातरी जड वस्तूने प्रहार करून तिची हत्या केल्याचे निदर्शनास आले. मृतदेहाजवळ मृत महिलेची ओळख पटविणारी काहीही वस्तू देखील पोलिसांना साडपलेली नव्हती. त्यानंतर कक्ष ६ ने गोवंडी, शिवाजीनगर, मानखुर्द, देवनार आणि ट्रॉम्बे या परिसरात ५ वेगवेगळी पथके रवाना करून जलद गतीने तपास केला. शिवाजी नगर परिसरात तपास करत असताना एका पथकातील पोलीस हवालदार मनोहर भोसले यांच्या त्या परिसरातील गोपनीय सूत्रांकडून आणि तांत्रिक तपासात मृत महिलेचे नाव नूर बेगम असून तिचे तिच्या पतीशी भांडण होत असल्याची माहिती मिळाली. मृत महिलेचा पती उत्तर प्रदेशातील मूळ गावी पळून जाण्याच्या तयारीत असताना पोलीस त्याच्या मुसक्या आवळल्या. त्यानंतर हत्येची उकल झाली. ४ सप्टेंबरला नूरचे पतीसोबत कडाक्याचे भांडण झाल्याने रात्री १० ते १०. ३० वाजताच्या सुमारास रागाच्या भरात सायन - ट्रॉम्बे रोडवर नूरच्या डोक्यावर दोनवेळा जड दगडाने प्रहार करून तिची हत्या केल्याचे अटक पतीने कबुली दिली.