एक व्यक्ती बोगस आधार कार्ड वापरून विमानातून प्रवास करत होता. त्याच्या डोक्यात एक भन्नाट कल्पना आली आणि त्याने सोन्याची तस्करी करण्याचा एक अनोखा कट रचला. त्याने एक कोटी रुपयांपेक्षा जास्त किमतीचं सोनं परदेशातून आणलं आणि विमानामध्येच बेवारस सोडून दिलं. हे सगळं त्याने जाणूनबुजून केलं, जेणेकरून परदेशातून आल्यामुळे तो चौकशीत अडकू नये. झालंही तसंच, तो मुंबई विमानतळावरून आरामात बाहेर पडला. दोन दिवस सोनं विमानातच राहिलं आणि विमान उडत राहिलं. पुढे जे घडलं ते ऐकून तुमच्या भुवया उंचावतील.
परदेशातून आलेला हा तस्कर १४ जून रोजी कोलकाताहून चेन्नईला आला, तेव्हा अधिकाऱ्यांनी त्याला देशांतर्गत टर्मिनलवर ताब्यात घेतलं. त्याच्याकडून पेस्टच्या स्वरूपात १.१३ किलो सोनं जप्त करण्यात आलं. हा व्यक्ती मुंबईला उतरला होता, तर कोलकाताला कसा पोहोचला? ही घटना कालक्रमानुसार समजून घेण्यासाठी काही गोष्टी उलट तपासल्या गेल्या. तपासात असं निष्पन्न झालं की, हे सोनं तो बंगालमधून नव्हे, तर अबू धाबीहून तस्करी करून घेऊन आला होता. त्याची ही पूर्ण चाल पाहून अधिकारीही थक्क झाले.
तपासात असंही समोर आलं की, तो अबू धाबीहून मुंबईला सोन्याची तस्करी करत होता. स्वतःला वाचण्यासाठी त्याने देशांतर्गत मार्गातून चेन्नईला सोनं आणण्याचा प्रयत्न केला. 'टाइम्स ऑफ इंडिया'च्या रिपोर्टनुसार, या तस्कराने १२ जून रोजी अबू धाबीहून पेस्टच्या स्वरूपात सोनं आणलं आणि ते आपल्या सीटखाली लपवून ठेवलं. सोनं तिथेच बेवारस पडून होतं. तो मुंबई विमानतळावरून आरामात सोनं न घेताच बाहेर पडला. त्यानंतर तिथून तो चेन्नईत गेला.
विमानाचा मागोवा घेतला आणि...त्याने विमानाचा युनिक नंबर वापरून सतत त्याचा मागोवा घेतला. हे करणं खूप सोपं आहे, कारण आजकाल अनेक साईट्सवर लाइव्ह ट्रॅकिंग उपलब्ध आहे. त्याला कळलं की, हेच विमान १४ जून रोजी कोलकाताहून चेन्नईसाठी उड्डाण करणार आहे. त्याने तात्काळ कोलकाताला जाण्याचा निर्णय घेतला. रिपोर्टनुसार, तो चेन्नईहून कोलकाताला गेला आणि इंडिगोच्या त्याच विमानात त्याच सीटवर परत बसला, जिथे त्याने सोनं ठेवलं होतं. त्याने तिथेच असलेलं सोनं आरामात बाहेर काढलं.
आता ४८ तासांनंतर सोनं घेऊन तो चेन्नई विमानतळावरून बाहेर पडू लागला. मात्र, यात तो यशस्वी होऊ शकला नाही. तपासात असंही निष्पन्न झालं की, त्याने बोगस आधार कार्डचा वापर करून दुसऱ्या नावाने तिकीट बुक केलं होतं आणि आपली ओळख बदलली होती. त्याच्याकडून दोन बोगस आधार कार्ड आणि ८९८ ग्रॅम सोनं देखील जप्त करण्यात आलं. एकूण त्याच्याकडून २ कोटी रुपयांपेक्षा जास्त किमतीचं सोनं जप्त करण्यात आलं.