तळेगाव (श्या.पंत)/(वर्धा) : कौटुंबिक कलहातून पत्नीच्या डोक्यावर कुऱ्हाडीने दोन वार करीत तिला जिवे मारण्याचा प्रयत्न करणाऱ्या पतीने स्वत: झाडाला गळफास घेऊन आत्महत्या केल्याची धक्कादायक थरारक घटना दि. १२ रोजी सकाळी ८ वाजताच्या सुमारास भारसवाडा शिवारात उघडकीस आली.
सुरेश रामचंद्र चांगाेले (४०, रा. आष्टी) असे मृतकाचे नाव आहे, तर पत्नी मंगला चांगाले ही गंभीर जखमी असून तिच्यावर नागपूर येथील रुग्णालयात उपचार सुरू असल्याची माहिती तळेगाव पोलिसांनी दिली. मंगला सुरेश चांगाेले (३८) ही घरी असताना आरोपी पती सुरेश चांगोले याचा तिच्याशी घरगुती कारणातून वाद झाला. दरम्यान, सुरेशने रागाच्या भरात पत्नी मंगलाच्या डोक्यावर कुऱ्हाडीने दोन वार करीत जिवे मारण्याचा प्रयत्न केला. जखमी मंगलाचा भाऊ अंकुश काशिनाथ राऊत याने याबाबतची तक्रार तळेगाव पोलिसात दाखल केली होती. पोलिसांनी खुनाचा प्रयत्न केल्याप्रकरणी आरोपी सुरेशविरुद्ध गुन्हा दाखल केला होता. ही घटना ११ रोजी सकाळी १० वाजताच्या सुमारास घडली होती.
याप्रकरणी आरोपी सुरेशचा शोध पोलीस घेत असतानाच तळेगाव पोलीस ठाण्याच्या हद्दीत येणाऱ्या भारसवाडा गावातील शेतशिवारात आरोपी सुरेशने झाडाला गळफास घेत आत्महत्या केल्याची माहिती मिळाली. पोलिसांनी दि. १२ रोजी मंगळवारी सकाळी ८ वाजताच्या सुमारास भारसवाडा येथे जाऊन पंचनामा करून सुरेश चांगोले याचा मृतदेह उत्तरीय तपासणीसाठी रुग्णालयात पाठविला असून पत्नी मंगलावर नागपूर येथील रुग्णालयात उपचार सुरू असल्याची माहिती पोलिसांनी दिली.