नवी दिल्ली - प्रेमासाठी काही लोक वाटेल ते करतात. प्रेमाचे अनेक भन्नाट किस्से हे सतत समोर येत असतात. अशीच एक अजब घटना समोर आली आहे. एक महिला विवाहित व्यक्तीच्या प्रेमात पडली आणि पुढे जे काही घडलं ते वाचून धक्काच बसेल. एका महिलेचे एका विवाहित पुरुषाशी प्रेमसंबंध होते. मात्र, हे सर्व लग्नापर्यंत पोहोचल्यानंतर प्रियकराने तिला नकार दिला. यानंतर संतापलेल्या महिलेने प्रियकराच्या घरासमोरच ठाण मांडले.
"आताच माझ्याशी लग्न कर" असं म्हणत 2 मुलांचा बाप असलेल्या प्रियकराच्या घरासमोर प्रेयसीचा हायव्होल्टेज ड्रामा पाहायला मिळाला. महिला आणि तिचा प्रियकर यांची या महिलेच्या बहिणीच्या घरी ओळख झाली. यानंतर ते दोघे प्रेमात पडले. प्रियकराने प्रेमाचं आणि लग्नाचं आश्वासन देत आपल्याशी 6 महिने संबंध ठेवल्याचा आरोप या प्रेयसीने केला आहे. याबद्दलची तक्रार तिने पोलिसात दिली असून प्रियकराने आपल्याला फसवल्याचं म्हटलं आहे.
मिळालेल्या माहितीनुसार, बिहारमधील बेतियामध्ये ही घटना घडली आहे. 'मी लॉरिया पोलीस ठाण्यात प्रियकराच्या विरोधात अर्ज केला आहे. तो माझ्याशी लग्न करेपर्यंत मी हे घर सोडणार नाही' असंही तिने म्हटलं आहे. प्रेयसीने आपल्या तक्रारीत म्हटलं आहे की, प्रियकर आधीच विवाहित होता. दोघेही प्रेमात पडल्यानंतर प्रियकराने महिलेचा फोटो काढून तिला प्रेमाचं आश्वासन दिलं. यानंतर प्रियकराने आपल्या फोटोसोबत छेडछाड करून त्याच्याशी स्वतःचा फोटो जोडला आणि अश्लील फोटो तयार केला.
तो फोटो आपल्या पतीला नेऊन दाखवला, असा आरोप महिलेने केला आहे. प्रियकराने तिच्या पतीला त्यांच्यातील प्रेमसंबंधांविषयी सांगितल्यामुळे पतीने आपल्याला घरातून हाकलून दिल्याचा आरोप महिलेने केला आहे. यानंतर संतापलेल्या महिलेनं प्रियकराचं घर गाठलं आणि तिथे तळ ठोकला. लग्न करण्याचं आश्वासन देऊन त्याने तिच्याशी संबंध ठेवले, असं तिचं म्हणणं आहे. महिलेचा प्रियकर विवाहित असून तो दोन मुलांचा बाप आहे, असं सांगितलं जात आहे. एका हिंदी वेबसाईटने याबाबतचे वृत्त दिले आहे.