हैदराबादमधून एक धक्कादायक बातमी आली आहे. एका ३९ वर्षीय महिलेची हत्या तिच्याच १६ वर्षीय मुलीने केल्याचा आरोप आहे. या हत्येमध्ये तिचा प्रियकरही सामील आहे. हे संपूर्ण प्रकरण एका कथित प्रेमप्रकरणाशी संबंधित आहे.
मिळालेल्या माहितीनुसार, या दोघांची ओळख सोशल मीडियावर झाली. यानंतर त्या १६ वर्षीय तरुणी आणि डिजे ऑपरेटर यांच्यात प्रेम प्रकरण सुरू झाले. मृत महिला एकटी आई होती जी 'कला सारथी'मध्ये हस्तकला काम करायची आणि एससी/एसटी सेल आणि महिला मंडळातही सक्रिय होती. तिने तिच्या आयुष्यात खूप संघर्ष केला होता आणि एकटीने दोन मुलींचे संगोपन करत होती.
हत्येचा भयानक कट
हे प्रकरण हैदराबादच्या जीदीमेटला भागातील आहे. पोलिसांनी दिलेल्या माहितीनुसार, मृत महिला तिच्या दोन मुलींसह जीदीमेटला येथील शापूर नगर येथे भाड्याच्या घरात राहत होती. तिची मोठी मुलगी दहावीची विद्यार्थिनी आहे. गेल्या डिसेंबरमध्ये तिची इंस्टाग्रामद्वारे नालगोंडा जिल्ह्यातील डीजे असलेल्या १९ वर्षीय पी. शिवाशी मैत्री झाली. ही मैत्री हळूहळू प्रेमात बदलली.
१९ जून रोजी, किशोरी तिच्या प्रियकरासोबत घरातून पळून गेली, त्यानंतर अंजलीने पोलिसांकडे अपहरणाचा गुन्हा दाखल केला. पोलिसांनी सूर्यपेट येथील शिवाच्या आजी-आजोबांच्या घरातून मुलीला ताब्यात घेतले आणि तिच्या आईच्या स्वाधीन केले. तेव्हापासून, आई आणि मुलीमध्ये त्यांच्या नात्यावरून सतत तणाव आणि भांडणे सुरू होती.
पोलिसांनी दिलेल्या माहितीनुसार, २३ जून रोजी रात्री मुलीने आपल्या आईच्या त्रासाला कंटाळून प्रियकर शिवा याला फोन केला. यावेळी तिने आईच्या विरोधात त्याला सांगितले. यानंतर या दोघांनी मिळून साडीने महिलेचा गळा दाबून तिला मारण्याचा प्रयत्न केला. जेव्हा त्यांना वाटले की ती मेली आहे, तेव्हा ते तिथून पळून गेले. पण नंतर मुलीने पाहिले की तिची आई अजूनही श्वास घेत आहे. यानंतर तिने शिवाला पुन्हा बोलावले. यावेळी दोघांनीही महिलेची कवटी आणि नाकावर हातोड्याने वार करून तिची हत्या केली.
खोटी माहिती अन् झाला खुलासा
रात्री ११.३० वाजताच्या सुमारास, मुलीने तिच्या मावशी आणि इतर नातेवाईकांना फोन करून आई खुर्चीवरुन पडल्याची माहिती दिली. पोलिस घटनास्थळी पोहोचताच त्यांना संशय आला. त्यांनी तपास सुरू केला. पोलिसांनी तपास केल्यानंतर मुलगी आणि प्रियकराला अटक केली.