ठळक मुद्देपूर्ववैमनस्यातून जानू पवार उर्फ बिल्ला या गुंडाची गोळ्या घालून हत्या करण्यात आली. आज सकाळी ही घटना घडली असून त्यानंतर परिसरात तणावाचं वातावरण निर्माण झालं होतं.बिल्लाने विनोदचा भाऊ दिपक पवार याची काही वर्षांपूर्वी हत्या केली होती.
मुंबई - कुर्लामधील हलवा पूल येथे पूर्ववैमनस्यातून जानू पवार उर्फ बिल्ला या गुंडाची गोळ्या घालून हत्या करण्यात आली. आज सकाळी दिवसाढवळ्या ही घटना घडली असून त्यानंतर परिसरात तणावाचं वातावरण निर्माण झालं होतं. मारेकऱ्यांची ओळख पटली असून विनोबा भावे नगर पोलिसांनी बिल्लाचा सावत्र भाऊ विनोद पवार याला ताब्यात घेतलं आहे.
कुर्ल्यातील विनोबा भावे परिसरात बिल्लाची मोठी दहशत होती. नागरिकांना धमकावणं आणि त्यांना मारहाण करणं या सारख्या अनेक गुन्ह्यांची नोंद मुंबईतल्या विविध पोलीस ठाण्यात बिल्लावर आहे. तेथील एका दुसऱ्या टोळीसोबत त्याचा वाद सुरू होता. काही दिवसांपूर्वीच बिल्ला जामीनावर बाहेर आला होता. आज सकाळी बिल्ला हलवा पूल येथून जात असताना दुचाकीहून आलेल्या दोघांनी त्याच्यावर दोन गोळ्या झाडल्या. रक्ताच्या थारोळ्यात पडलेल्या बिल्लाला जमावाने तातडीने रिक्षातून सायन रुग्णालयात नेले. मात्र उपचारादरम्यान त्याचा मृत्यू झाला.
या घटनेबाबत माहिती मिळताच विनोबा भावे पोलिसांनी घटनास्थळी धाव घेतली. पोलिसांनी या प्रकरणी हत्येचा गुन्हा नोंदवला आहे. पूर्ववैमनस्यातून ही हत्या करण्यात आली असल्याचं पोलिसांकडून सांगण्यात आलं. बिल्लाने विनोदचा भाऊ दिपक पवार याची काही वर्षांपूर्वी हत्या केली होती. त्याच वादातून बिल्लाची हत्या केल्याची शक्यता वर्तवली जात आहे. या प्रकरणी पोलीस अधिक तपास करत आहेत.