मीरारोड - भाईंदर पूर्वेच्या जेसलपार्क भागात क्रिकेट खेळताना चिडवल्यावरून एका कुटुंबातील लोकांनी साथीदारांसह दुसऱ्या कुटुंबास मारहाण - शिवीगाळ करत अल्पवयीन मुलास चावून जखमी केल्या प्रकरणी ७ जणांवर नवघर पोलिसात गुन्हा दाखल करण्यात आला आहे.
१४ जून रोजी दाखल सदर गुन्ह्यातील फिर्यादी भावना तिवाडी ह्या एका संस्थेच्या अध्यक्ष असून कुटुंबासह जेसलपार्कच्या स्वागतम कॉम्प्लेक्स मध्ये राहतात . त्यांचा १५ वर्षीय मुलगा सुजित हा इमारतीच्या आवारात क्रिकेट खेळत असताना तेथे खेळणाऱ्या निरंक राठोड ह्या मुलास चिडवले . त्या वरून निरंकचे काका भावना यांच्या घरी जाऊन सासू कडे सुजीतची तक्रार केली . नंतर सुजित इमारत आवारात खाली बसला असल्याचे पाहून त्याला शिवीगाळ केली.
सुजितला शिवीगाळ केल्याचा जाब विचारण्यासाठी वडील मनीष हे सुजित व देव ह्या मुलांना घेऊन निरंकच्या घरी गेले असता त्याची आत्या समीक्षा व त्यांच्यात वाद सुरु झाला . निरंकाचे आजोबा सतेंद्रसिंग राठोड यांनी देवचा हात पिरगळला तर समीक्षा हिने सुजितच्या हातावर कडकडीत चावून रक्तबंबाळ केले . नंतर आणखी ४ ते ५ जणांनी देव ह्याला लाथा बुक्क्यांनी बेदम मारहाण केली . या प्रकरणी सतेंद्रसिंग राठोड, समीक्षा राठोड , निरंक चे काका व अन्य ४ अनोळखी लोकांवर गुन्हा दाखल करून नवघर पोलीस तपास करत आहेत.