टनकपूर – उत्तराखंड येथील टनकपूर शहरात एका २ वर्षाच्या मुलाला औषधाच्या रिएक्शनने नव्हे तर सावत्र बापाने छातीवर लाथ मारल्याने मृत्यू झाल्याचं उघड झालं आहे. आरोपीने मुलाच्या हत्येनंतर पत्नीलाही जीवे मारण्याची धमकी देत काहीही वाचा न फोडण्याची ताकीद दिली. निष्पाप मुलाच्या आईची विचारपूस केल्यानंतर पोलिसांनी हत्येचे गूढ उघड केले.
कोर्टाच्या आदेशानुसार पोलिसांनी आरोपी सावत्र बापाला अटक केली आणि तुरूंगात पाठविले आहे. रविवारी शहरातील प्रभाग क्रमांक चारमधील नरेश कुमारचा दोन वर्षाचा मुलगा सोनूचा संशयास्पद परिस्थितीत मृत्यू झाला होता. बेशुद्ध अवस्थेत कुटुंबीयांनी सोनूला सामान्य रूग्णालयात आणले त्याठिकाणी वैद्यकीय अधिकारी डॉ. निहाल अख्तर यांनी मुलाला मृत घोषित केले.
सर्व कुटुंब मुलाच्या अंत्यविधीची तयारी करत असताना कोणीतरी पोलिसांना याबाबत माहिती दिली की, सोनूच्या सावत्र बापाने त्याला मारलं आहे. तात्काळ पोलीस घटनास्थळी पोहचले, पोलिसांनी आईकडे विचारपूस केली असता तिने तिच्या पतीचा बुरखा फाडत सोनूच्या हत्येचे गुपित उघड केले. यानंतर पोलिसांनी निष्पाप सोनूचा मृतदेह ताब्यात घेतला.
पोलीस प्रमुख जसवीरसिंग चौहान म्हणाले की, तपासात सावत्र पिता नरेश कुमारने मुलाची हत्या केल्याचं उघड झालं. मुलाची हत्या केल्यानंतर आरोपी नरेश फरार झाला होता, परंतु पोलिसांनी त्याला बनबासा आर्मी छावणीच्या ऑफिसर कॉलनीजवळ अटक केली. याप्रकरणी आरोपीवर आयपीसीच्या कलम ३०२ आणि ५०६ नुसार अटक करून तुरूंगात पाठविण्यात आले आहे.
आरोपी बापाने दुसर्‍या कोणत्याही कारणास्तव मुलाची हत्या केली नाही तर फक्त मुलगा रडत असल्याने त्याचा खून केल्याची धक्कादायक माहिती दिली. आरोपीला रागाने मुलाच्या छातीत लाथ मारल्यानंतर सोनू २४ तास तडफडत होता. त्यावेळी पत्नीने विनवणी केल्यानंतरही निर्दयी बापाने त्याला उपचारासाठी रुग्णालयात नेले नाही.
सावत्र बाप शबानाच्या पहिल्या पतीपासून जन्मलेल्या दोन्ही मुलांना तिरस्कार करत होता. शनिवारी आरोपी झोपला होता त्यादरम्यान त्याचा दोन वर्षाचा सावत्र मुलगा सोनू रडू लागला. शबाना सोनूला शांत करायच्या आधीच बाप झोपेतून उठला आणि त्याने सोनूच्या छातीवर लाथा मारल्या. पत्नी शबाना जखमी सोनूला उपचारासाठी दवाखान्यात नेण्याची विनवणी करत राहिली, परंतु नरेशला त्या सोनूवर दया आली नाही. सोनू तडफडत होता. २४ तासानंतर सोनूचा मृत्यू झाला. तेव्हा आरोपी बापाने त्याला दवाखान्यात नेले. मुलाला पोटदुखीची औषधं खायला दिले होते असं सांगून डॉक्टर आणि पोलिसांची दिशाभूल केली अशी माहिती पोलिसांनी दिली आहे.