ठळक मुद्देगौतम दिलीप दत्ता (४६) असे अटक करण्यात आलेल्या आरोपीचे नाव असून, त्याच्याकड़ून ५० लाख किंमतीचे एक किलो चरस जप्त करण्यात आले आहे.
मुंबई : बॉलीवूडमधील कलाकारांना चरसचा पुरवठा करणाऱ्या एका यूट्यूब चँनेलच्या संचालकाला अंमली पदार्थ विरोधी विभागाच्या वांद्रे पथकाने शुक्रवारी बेडया ठोकल्या आहेत. गौतम दिलीप दत्ता (४६) असे अटक करण्यात आलेल्या आरोपीचे नाव असून, त्याच्याकड़ून ५० लाख किंमतीचे एक किलो चरस जप्त करण्यात आले आहे.
जुहू वर्सोवा लिंक रोड परिसरात दत्ताच्या संशयास्पद हालचाली एएनसीच्या वांद्रे पथकाने हेरल्या. त्यानुसार पथकाने त्याला ताब्यात घेत त्याच्याकडील लाल पिशवीची तपासणी करताच, त्यात एक किलो चरस मिळून आला.
दत्ता हा बीग गी यूट्यूब चँनेलचा संचालक आहे. यातूनच झालेल्या ओळखीतून तो बॉलीवूड मधील कलाकारांना चरसचा पुरवठा करत असल्याची माहिती समोर आली आहे. त्यानुसार त्याच्याविरुद्ध चरस विक्री प्रकरणी गुन्हा नोंदवत एएनसी अधिक तपास करत आहे.