उत्तर प्रदेशच्या एटामध्ये धक्कादायक प्रकार समोर आला आहे. प्रेयसीने प्रियकराला भेटण्यास बोलावून कोल्ड ड्रिंकमधून विष पाजले. त्याहून कहर म्हणजे जेव्हा प्रियकर मरणाच्या दारात होता तेव्हा तिने त्याला फोन करून विषप्रयोगातून वाचलास तर गळफास लाऊन घे, ओके गुडबाय, असे म्हटल्याचे समोर येत आहे.
हे प्रेमप्रकरण नारायण नगरच्या चित्रा आणि हाथरसच्या अंकित कुमारचे आहे. दोघांनाही लग्न करायचे होते. परंतू त्यांचे प्रेमप्रकरण चित्राच्या घरच्यांना पटत नव्हते. यामुळे ते दोघांच्या लग्नाला तयार नव्हते. अखेर घरच्यांसाठी प्रियकराचा पिच्छा सोडविण्यासाठी चित्राने खतरनाक प्लॅन आखला होता.
चित्राचे लग्न बुलंदशहरच्या एका तरुणाशी लावून दिले होते. तरी देखील चित्रा प्रियकर अंकितला भेटत होती. यामुळे चित्राचा भाऊ तिच्यावर नाराज होता. या साऱ्या विरोधातून चित्राने अंकितचा काटा काढण्याचे ठरविले. एके दिवशी तिने त्याला एटा बस स्टँडवर बोलावले. तसेच त्याला कोल्ड ड्रिंक दिले. काही वेळ बोलून चित्रा घरी परतली. मात्र, इकडे थोड्याच वेळात अंकितची तब्येत बिघडू लागली. यामुळे तो बसमध्ये बसून मैनपुरीला निघाला.
यावेळी त्याने त्याच्या भावाला फोन करून चित्राने कोल्ड ड्रिंकमध्ये काहीतरी मिसळून दिले आणि तब्येत बिघडत असल्याचे सांगितले. अंकित मैनपुरीला पोहोचताच त्याला हॉस्पिटलमध्ये दाखल करण्यात आले तिथे त्याचा मृत्यू झाला.
जेव्हा अंकित हॉस्पिटलमध्ये अखेरचे श्वास घेत होता, तेव्हा चित्राचा त्याला फोन आला. तेव्हा अंकितने फोन उचलताच चित्राने त्याला काही झाले नसेल तर गळफास लावून घे, गुडबाय असे म्हटले. यावर अंकितने अजून काही राहिले असेल तर ते पण पाज असे म्हटले. तेव्हा चित्राने बस, असाच आपला जीव दे असे उत्तर देऊन फोन ठेवला.
पोलिसांना अंकित आणि चित्राचे १६ मार्चपूर्वीचे ऑडिओ रेकॉर्डिंग सापडले आहेत. त्यात चित्रा त्याला छाती ठोकून ये आणि आल्यावर छाती बदडून घे, आदी संभाषण हाती लागले आहे. याद्वारे चित्राने अंकितला मारण्याचा आधीपासूनच प्लॅन केला होता हे समोर येत असल्याचे पोलिसांनी सांगितले.