मुंबई - काही दिवसांपूर्वी मुंबईतील मालाड परिसरात २० वर्षीय मॉडेल मानसी दीक्षितच्या हत्येप्रकरणी १९ वर्षीय मुझमिल्ला सय्यदला अटक करण्यात आली. बांगुर नगर पोलिसांनी त्याची अधिक तपासणी केली असता, शरीरसंबंध ठेवण्यास नकार दिल्यामुळे तिचे डोके स्टुलावर आपटून तिची हत्या केल्याची कबूली सय्यदने दिली.
सोमवारी संध्याकाळी मालाडच्या माईंडस्पेस परिसरात एका सुटकेसमध्ये मानसीचा मृतदेह सापडलेला. मानसी रविवारी राजस्थानमध्ये राहत असलेल्या तिच्या आई- वडिलांना भेटून मुंबईत आली होती. सय्यदही मुळचा हैदराबादचा असून तोही काही दिवसांसाठी त्याच्या घरी गेला होता. सोमवारी मानसी अंधेरी येथील मिलत नगर परिसरातील सय्यदच्या घरी त्याला भेटायला गेली. तेव्हा सय्यदने तिच्याकडे शरीरसंबंध ठेवण्याची मागणी केली. मानसीने त्यासाठी नकार दिल्यावर सय्यदला राग अनावर झाला आणि त्याने घरातील लाकडी स्टुलावर तिचे डोके आपटले. यात मानसी जागीच कोसळली. तेव्हा सय्यद फार घाबरला. मानसीला शुद्धीवर आणण्यासाठी तिच्या तोंडावर पाणी शिंपडत होता. काही वेळासाठी ती शुद्धीवर आली. मात्र, नंतर तिचा मृत्यू झाला. त्याची आई घरी येईल या भितीने सय्यदने तिला दोरीने बांधले आणि एका बॅगमध्ये टाकले आणि नंतर तिचा मृतदेह एका बॅगमध्ये भरून मालाड येथील एका कॉल सेंटरच्या जवळ असणाऱ्या झुडपांमध्ये फेकून दिला.