नरेश डोंगरे
नागपूर : स्टॅमिना गेन करण्यासाठी आणि स्वतःला पॉवरफुल बनविण्यासाठी घेतल्या जाणाऱ्या स्टेरॉईडसारख्या उत्तेजक पदार्थांचा डोस जास्त झाल्यास माणूस जनावर बनू शकतो. त्याची मानसिकता विकृत होते आणि तो कोणत्याही थराला जाऊ शकतो. नागपुरातील हुडकेश्वर पोलिस ठाण्याच्या हद्दीत शनिवारी रात्री घडलेल्या एका थरारक हत्याकांडामुळे हे चक्रावून सोडणारे वास्तव उजेडात आले आहे. यामुळे डॉक्टर पोलीस सारेच चक्रावले आहेत.विक्रांत पिल्लेवार (वय २५) नामक एका नराधमाने त्याच्या पित्याचे गुप्तांग चावून तोडून काढले आणि गळ्यासह शरीराच्या अनेक नाजूक भागावर चावे घेऊन त्यांची अमानुष हत्या केली. या घटने दरम्यान शेजार्‍यांनी धाव घेऊन त्याला आवरण्याचा प्रयत्न केला. अवघा २५ वर्षांचा आरोपी आठ ते दहा लोकांना आवरत नव्हता. काही वेळातच तेथे पोलीस पोहोचले. पोलिसांनीही त्याला आवरण्याचा प्रयत्न केला मात्र सात ते दहा पोलीसांवर आरोपी हावी झाला होता. त्याने अनेक पोलिसांना मारहाण केली त्याला कसेबसे आवरून मेडिकलमध्ये वैद्यकीय तपासणीसाठी नेले असता तेथेही त्याने गोंधळ घातला आणि अनेकांना मारहाण करण्याचा प्रयत्न केला. त्यांची एकूणच स्थिती लक्षात घेता पोलिसांनी त्याचे हात-पाय करकचून बांधल्यानंतर त्याला कसेबसे रात्रभर ठेवले आणि रविवारी त्याची पोलिस कोठडी न मागता त्याला थेट कारागृहात पाठविण्याची विनंती न्यायालयात केली.
दरम्यान, इतक्या क्रूरपणे जन्मदात्या वडिलांसोबत कुणी कसा वागू शकतो, असा प्रश्न उपस्थित झाला आहे. पोलिस या प्रश्नाचे उत्तर शोधण्यासाठी चौकशी करीत आहेत. प्राथमिक तपासात पोलिसांना आरोपीच्या घरात फ्रिज मध्ये आणि कार मध्ये मोठ्या प्रमाणावर स्टेरॉईड आणि सिरिंज सापडल्या. काही उत्तेजक औषधही सापडले. त्याची तपासणी केली असता अत्यंत धक्कादायक माहिती उजेडात आली.
सूत्रांच्या माहितीनुसार, रेसमध्ये धावणाऱ्या घोड्यांना जे उत्तेजक द्रव्य इंजेक्शन मधून दिले जाते ते आरोपी विक्रांत पिल्लेवार स्वतः घ्यायचा. तो एका जिममध्ये पार्टनर कम ट्रेनर म्हणून काम करीत होता. सिक्स पॅक बॉडी बिल्डर असलेला विक्रांत स्वतःला मेंटेन करण्यासाठी नेहमी स्टेरॉइडसह अन्य काही उत्तेजक पदार्थ नियमित घेत होता. लॉकडाऊनमुळे जिम बंद झाल्याने त्याचे हेवी वर्कआऊट (व्यायाम) बंद झाले होते. मात्र तशातही उत्तेजक द्रव्य तो नेहमी घ्यायचा. शनिवारी सकाळी नेहमीप्रमाणे त्याने उत्तेजक पदार्थांचा हेवी डोज घेतला. त्यानंतर तो डोके फिरल्यासारखा वागू लागला. दिवसभर त्याने विकृत चाळे केल्याने आई, बहीण आणि वडीलही बेचैन झाले. त्यांनी त्याला असे का वागतो, अशी विचारणा केली अन आक्रीत घडले. त्याने वडिल विजय पिल्लेवार यांना बेदम मारहाण केली. त्यांचे गुप्तांग दाताने तोडून काढले. गळा आणि शरीराच्या इतर नाजुक भागावर ठिकठिकाणी जनावरासारखे चावे घेऊन त्यांची भीषण हत्या केली. तो जनावरासारखा वागत होता. हा सर्व परिणाम त्या स्टेरॉइड आणि अन्य उत्तेजक पदार्थाच्या अतिसेवनाचा असल्याचा प्राथमिक निष्कर्ष पोलिसांनी डॉक्टर्ससह अन्य तज्ञांशी चर्चा केल्यानंतर काढला आहे. सूत्रांच्या माहितीनुसार, आरोपी विक्रांत पिल्लेवार याच्याकडे सापडलेल्या काही गोळ्या आणि सिरिंजमधून घेतले जाणारी औषधे पोलिसांनी तपासली. रेस मध्ये धावणाऱ्या घोड्यांना जे उत्तेजक पदार्थ दिले जातात त्याच धरतीचे हे सर्व उत्तेजक पदार्थ असल्याचे स्पष्ट झाले आहे. दरम्यान, या पदार्थांच्या अतिसेवनामुळे माणूस विकृतच होत नाही तर तो जनावरासारखा वागू शकतो, हे या घटनेवरून स्पष्ट झाले आहे. त्यामुळे बॉडी बनविण्यासाठी, मेंटेन करण्यासाठी आणि स्वतःला पॉवरफुल बनविण्यासाठी स्टेरॉईड तसेच अन्य उत्तेजक पदार्थाचे सेवन करणाऱ्या मंडळींनी अंतर्मुख होण्याची वेळ आली आहे.
सहज मिळतात उत्तेजक पदार्थ सध्या जिममध्ये जाण्याचे फॅड सर्वत्र चांगलेच वाढले आहे. जिममध्ये जाणाऱ्या मंडळींना अल्पावधीतच वेट लॉस, वेट गेन, पॉवर गेन करण्यासाठी आणि मसल्स बनविण्यासाठी काही ट्रेनर किंवा जिममालक उलट-सुलट सल्ला देतात. ते त्यांना वेगळ्या प्रकारचे प्रोटीन पावडर आणि काही औषधेही उपलब्ध करून देतात. स्टेरॉईडही सहज मिळवून दिले जाते. काही महिन्यांपूर्वी मुंबईत अशाच एका बॉडीबिल्डरने स्टेरॉइडसचा हेवी डोज घेतल्याने त्याचा मृत्यू झाला होता. तर, आता अशा प्रकारच्या उत्तेजक पदार्थाच्या सेवनातून माणसाची वृत्ती जनावरासारखी बनू शकते, याचा भयावह प्रत्यय आला आहे.