डोंबिवली - एकीकडे कल्याण डोंबिवली शहरात रोजच घरफोडीच्या घटना घडत असताना दुसरीकडे पेट्रोल पंपावरदरोडा टाकण्याच्या तयारीत असलेल्या पाच जणांना कल्याण गुन्हे शाखेने अटक केली. असून कल्याण न्यायालयाने शुक्रवारपर्यंत पोलीस कोठडी सुनावण्यात आली आहे.
खोणी तळोजा रोड येथील एका पेट्रोल पंपावरदरोडा टाकण्यासाठी काही जण येणार असल्याची माहिती कल्याण गुन्हे शाखेचे वरिष्ठ पोलीस निरीक्षक संजू जॉन यांना मिळाली होती. या माहितीच्या आधारे पोलीस उपनिरीक्षक निलेश पाटील यांच्यासह पोलीस नाईक घोलप, थेरे, पोलीस हवालदार चव्हाण, खिल्लारे यांनी याठिकाणी सापळा लावला. यावेळी, महेंद्र सिंग (२५), सुशील शर्मा (२६), सतीश पटेल (२२), देवेंद्र सिंग (२७) आणि राजकुमार सोनी (३०, सर्व रा. उत्तरप्रदेश) हे संशयास्पद फिरताना आढळून आले. पोलिसांनी यासर्वांना चौकशीसाठी ताब्यात घेतले असता त्यांनी दरोडा टाकण्यासाठी आल्याची माहिती पोलीसाना दिली. या पाच जणांवर मानपाडा, समतानगर, बेलापूर आणि नवी मुंबई या ठिकाणीही गुन्हे दाखल आहेत. या पाच जणांनी काही दिवसांपूर्वी एका मोटारचालकाला बंदुकीचा धाक दाखवत त्याच्याकडील सोनसाखळी, मोबाईल आणि मोटार चोरून पोबारा केला होता. या सर्वांकडून गावठी कट्टा, जिवंत काडतुसे, फायटर, मिरचीची पूड, आणि मोटार पोलिसांनी हस्तगत केली आहे.