नितिन पंडीत भिवंडी - एकतर्फी प्रेमातून विकृत तरुणाने साथीदाराच्या मदतीने चाकूने तरुणीचे ओठ कापल्याची खळबळजनक घटना समोर आली आहे. या हल्ल्यात तरुणी जखमी झाल्याने तिला उपचारासाठी मुंबईच्या केईएम रुग्णालयात दाखल करण्यात आले आहे . या हल्ल्याप्रकरणी आरोपी तरुणासह त्याच्या साथीदार मित्रावर शांतीनगर पोलीस ठाण्यात सोमवारी गुन्हा दाखल करण्यात आला आहे .
मुक्तार अब्दुल रहीम अंसारी ( वय २३ , रा . किडवाई नगर ) व शाहिद असे गुन्हा दाखल झालेल्या विकृत तरुणांची नावे आहेत. मुक्तार अंसारी याचे शांतीनगर पोलीस ठाण्याच्या हद्दीत राहत असलेल्या एका तरुणीवर एकतर्फी प्रेम होते. मागील एक वर्षांपासून मुक्तार हा पीडित तरुणीला त्रास देत होता . मात्र मुलीचा या प्रेमाला विरोध होता. सदर मुलगी आपल्या प्रेमाला विरोध करते म्हणून मुक्तारने मुलीस अनेक धमक्यादेखील दिल्या होत्या . तू मेरी नही हुई तो मै तुझे किसी और के लायक नही छोडूंगा अशी धमकी देखील या विकृत तरुणाने पीडित मुलीला दिली होती .
९ एप्रिल रोजी पीडित तरुणी सकाळी घराबाहेर पडली असता मुक्तार व त्याच्या साथीदाराने तिला गाठले. त्यावेळी मुक्तारच्या साथीदाराने मुलाला जबरदस्तीने पकडून ठेवले असता मुक्तारने मुलीचा नकाब खेचला व आपल्या हातातील चाकूने मुलीच्या ओठांवर वर करत ओठ कापले . या हल्ल्यात मुलीच्या ओठांना मोठी जखम झाली आहे . जखमी अवस्थेत मुलीला उपचारासाठी सुरुवातील शहरातील स्व इंदिरा गांधी उपजिल्हा रुग्णालयात नेण्यात आले होते. मात्र, जखम मोठी असल्याने पुढील उपचारासाठी तिला ठाणे येथील कळवा रुग्णालयात पाठविण्यात आले मात्र ओठांवर सर्जरी करण्याची आवश्यकता असल्याने डॉक्टरांनी तिला मुंबईच्या केईएम रुग्णालयात जाण्याचा सल्ला दिला असता सध्या तिच्यावर केईएम रुग्णालयात उपचार सुरु आहेत . दरम्यान याप्रकरणी मुक्तार व त्याचा साथीदार शाहिद या दोघांवर शांतीनगर पोलीस ठाण्यात विविध कलमांतर्गत सोमवारी गुन्हा दाखल करण्यात आला असून हे दोघेही आरोपी फरार झाले असून पुढील तपास पोलीस उपनिरीक्षक सुप्रिया जाधव करीत आहेत.