रांची - झारखंडमधीली पलामू येथे कुटुंबीयांनी ज्या महिलेला मृत समजून दफन केले, ती जिवंत सापडली. (Crime News) पोलिसांनी तिला मुलासह ताब्यात घेतले. हरिहरगंजमधील बघाना गावामध्ये काही दिवसांपूर्वी १७ वर्षीय तरुणीचा मृतदेह सापडला होता. मृताची ओळख खुशबून निशा हिच्या रूपात पटली होती. तसेच पोस्ट मार्टमनंतर तिचा मृतदेह दफन करण्यात आला. आता या प्रकरणाला एक धक्कादायक वळण मिळाले आहे. पोलिसांनी खुशबून निशा हिला मुलासह छतरपूर येथून जिवंत ताब्यात घेतले आहे. खुशबून तिथे मुलासह भाड्याच्या घरात राहत होती. दुसरीकडे तिच्या हत्येच्या आरोपाखाली तिच्या पतीला अटक करून तुरुंगात पाठवले आहे. (Young woman buried by relatives found dead, found alive with child)
खुशबूनच्या कुटुंबीयांनी तिच्या पतीवर हत्येचा आरोप केला होता. त्यानंतर पोलिसांनी तिचा पती जावेद अंसारी याला अटक करून त्याची तुरुंगात रवानगी केली होती. आता छतरपूर पोलीस खुशबून निशा हिची चौकशी करत आहे. ती अचानक बेपत्ता का झाली होती. याचा तपास पोलीस करत आहेत.
नौडीहा पोलीस ठाण्यामधील अमवाबाडी गावात राहणाऱ्या खुशबून निशाचे लग्न २०१३ मध्ये जावेद अंसारी याच्याशी झाले होते. मिळालेल्या माहितीनुसार जावेद अंसारी याची खुशबून निशाही चौथी पत्नी आहे. खुशबून हिला तिचा पती नेहमी मारहाण करत असे. त्यामुळे ती मुलासह बेपत्ता झाली. त्यानंतर ती छतरपूर येथे जाऊन भाड्याच्या घरात राहत होती. स्थानिकांनी खुशबूनबाबत पोलिसांना माहिती दिली. त्यानंतर पोलिसांनी तिला ताब्यात घेतले. खुशबून हिचा पती जावेद अंसारी याच्यावर गुन्हा दाखल केला आहे.