भोपाळ - पत्नी, सुनेचा छळ झाल्याच्या अनेक घटना रोज समोर येत असतात. मात्र मध्य प्रदेशमधील धार येथे एका पतीने पत्नीच्या छळाला वैतागून आत्महत्या केल्याचे समोर आले आहे. पतीने गळफास लावून आपले जीवन संपवले असून, आपली सर्व करुण कहाणी त्याने सुसाईड नोटमध्ये लिहिली आहे. त्याआधारावर मृताची पत्नी आणि मेहुण्यांविरोधात गुन्हा दाखल करण्यात आला आहे.
या प्रकरणातील पतीला त्याच्या पतीने एवढे छळले की, त्याने अखेर गळफास लावून आपल्या जीवनाच शेवट केला. धारमधील वेअरहाऊसमधील कर्मचारी असलेल्या दीपक वसुनिया यांची ही करुण कहाणी आहे. दीपकने आपल्या घरात गळफास लावून आत्महत्या केली. याबाबतची माहिती मिळाल्यावर पोलिसांनी घटनास्थळावर पोहोचून मृतदेह ताब्यात घेतला. तसेच शवविच्छेदनासाठी रुग्णालयात पाठवला. घटनास्थळावर सापडलेल्या सुसाईड नोटमध्ये पत्नी टीना हिच्या छळाला कंटाळून आत्महत्या केल्याचे पीडित पतीने नमूद केले आहे.
दरम्यान, त्या आधारावर पोलिसांनी मृत व्यक्तीची पत्नी टीना आणि तिच्या दोन भावांना ताब्यात घेऊन कसून चौकशी केली. त्यामधून या संपूर्ण प्रकरणाचा उलगडा झाला. तसेच दीपक याची पत्नी भावांसोबच मिळून त्याला मारहाम करायची, त्याच्याकडील पगार काढून घ्यायची, असे मृत दीपकच्या भावाने सांगितले. तसेच या लोकांनी दीपकविरोधात पोलिसांत गुन्हाही दाखल केला होता. त्यामुळे दीपक त्रस्त होता. टीना त्याच्याकडील सगळा पगार काढून घेऊन माहेरी पाठवायची. तसेच त्याने नकार दिल्यावर भावांना बोलावून त्याला मारहाण करायची, अशीही माहिती समोर आली आहे.
संपूर्ण प्रकरणात शहर पोलिसांनी आरोपी पत्नी टीना आणि तिच्या माहेरच्या मंडळींविरोधात गुन्हा दाखल केला आहे. तसेच पुढील कारवाई सुरू आहे.