नवी दिल्ली - माणुसकीला काळीमा फासणारी एक घटना समोर आली आहे. छत्तीसगडमधील बिलासपूर जिल्ह्यात एका तरुणाला झाडाला उलटं लटकवून बेदम मारहाण करण्यात आली आहे. याचा एक व्हिडिओ सध्या सोशल मीडियावर व्हायरल झाला आहे. यामध्ये एका तरुणाला झाडाला उलटं लटकवून काही तरुण मारत असल्याचं पाहायला मिळत आहे. तरुण त्यांची माफी मागून मला मारू नका अशी विनंती करत होता. चोरीच्या संशयातून ही मारहाण करण्यात आली. त्यानंतर पोलिसांनी या प्रकरणी एका अल्पवयीन मुलासह पाच जणांना अटक केली आहे.
पोलीस अधिकाऱ्याने दिलेल्या माहितीनुसार, बिलासपूरच्या सिपत पोलीस स्टेशन हद्दीतील उचाभट्टी गावात तरुणाला मारहाण करण्यात आली आहे. यानंतर पोलिसांनी 15 वर्षीय मुलासह पाच जणांना अटक केली आहे. मनीष खरे, शिवराज खरे आणि जानू भार्गव यांना शुक्रवारी सायंकाळी उशिरा अटक करण्यात आली. या घटनेतील पीडित महावीर हा सूर्यवंशी जिल्ह्यातील रतनपूर भागातील रहिवासी आहे. या घटनेने एकच खळबळ उडाली आहे.
सिपत परिसरातील उचभट्टी गावात राहून तो मजूर आणि चौकीदार म्हणून काम करतो. असं समोर आलं आहे की 24-25 एप्रिलच्या मध्यरात्री मनीषने महावीरला घरात घुसण्याचा प्रयत्न करताना पाहिलं होतं. यावेळी महावीर पळून जाण्यात यशस्वी झाला, मात्र दुसऱ्या दिवशी सोमवारी मनीषने त्याला पकडलं आणि त्याच्यावर चोरीचा प्रयत्न केल्याचा आरोप करत पोलिसांच्या हवाली केलं. पोलीस अधिकाऱ्यांनी सांगितलं की, मनीषने महावीरविरुद्ध पोलिसांत गुन्हा नोंदवला नाही, त्यामुळे पोलिसांनी महावीरला इशारा देऊन सोडून दिलं.
पोलीस अधिकाऱ्यांनी सांगितलं की, नंतर मनीषने महावीरवर आरोप केला की बुधवारी रात्री महावीर पुन्हा त्याच्या घरी पोहोचला आणि बाहेर पार्क केलेल्या त्याच्या मोटरसायकलचं नुकसान करून पळून गेला. गुरुवारी, मनीष आणि इतर चार आरोपींनी महावीरला पकडलं आणि त्याला गावातील वीटभट्टीजवळील झाडाला उलटं टांगलं आणि मारहाण केली. त्यानंतर त्यांनी हा व्हिडिओ सोशल मीडियावर व्हायरल केला. एका हिंदी वेबसाईटने याबाबतचे वृत्त दिले आहे.