भोपाळ - मध्य प्रदेशमधील शाजापूर जिल्ह्यामधून एक धक्कादायक घटना समोर आली आहे. येथील मोहन बडोदिया परिसरामध्ये पत्नीने आपल्या पतीसह प्रेयसीला पाहिले. त्यानंतर संतप्त महिला पोलिसांसोबत घरी पोहोचली आणि तिने पती आणि त्याच्या प्रेयसीची तुफान धुलाई केली. महिलेचा पत्नी जितेंद्र शास्त्री हा धार्मिक कार्यक्रमांच्या आयोजनासोबत बाबा म्हणून ओळखला जातो. जेव्हा पत्नी आणि पोलिसांनी घरी असलेल्या महिलेबाबत कसून विचाराणा केली असता ती आपली शिष्या असल्याचा दावा त्याने केला.
बाबागिरी करणाऱ्या या व्यक्तीची पत्नी रक्षाबंधनासाठी माहेरी गेली होती. मात्र ती माहेरून घरी परतली तेव्हा तिने घरात अजून एक महिला असल्याचे पाहताच तिचा पारा चढला. तिने पोलिसांसमोरच जोरदार गोंधळ घातला. दरम्यान, दोन्ही महिलांनी एकमेकींच्या झिंज्या उपटत जोरदार मारहाण केली. त्यानंतर पोलीस त्यांना घेऊन ठाण्यात गेले. हा सगळा प्रकार पाहण्यासाठी बघ्यांची गर्दी झाली होती. दरम्यान, पत्नीच्या तक्रारीवरून पती जितेंद्र शास्त्रीविरोधात मोहन बडोदिया ठाणे पोलिसांनी गुन्हा नोंद करून घेतला आहे. तसेच या पत्नीने पतीविरोधात मारहाण आणि छळाचे आरोपही केले आहेत.
रक्षाबंधनासाठी माहेरी गेली असताना पत्नीला घरी पती कुठल्यातरी महिलेसोबत राहत असल्याची माहिती तिला मिळाली. त्यानंतर ती महिला थेट सासरी पोहोचली. तिने तिथे येऊन गोंधळ घातला. तसेच सोबत आलेल्या पोलिसांनी खोलीची झडती घेतली. तसेच एक कुलूप लावलेली खोली उघडण्यास सांगितले. सुरुवातीला पतीने ती खोली उघडण्यास नकार दिला. मात्र जेव्हा खोली उघडण्यात आली. तेव्हा आत एक कथित शिष्या सापडली. त्यानंतर सदर बाबाच्या पत्नीने घर डोक्यावर घेतले. आता पत्नीच्या तक्रारीवरून पोलिसांनी गुन्हा दाखल केला आहे.