नवी दिल्ली - घरामध्ये विविध कारणांमुळे नेहमीच वाद होत असतात. अनेकदा हे वाद टोकाला जातात आणि त्याचं रुपांतर हे पुढे हाणामारीत होतं. अशीच एक मन सुन्न करणारी घटना आता समोर आली आहे. एक क्षुल्लक वाद टोकाला गेला आणि भांडण झाल्यामुळे रागाच्या भरात मुलाने जन्मदात्या वडिलांच्या कानशिलात लगावल्याने त्यांचा जागीच मृत्यू झाल्याची धक्कादायक घटना घडली आहे. घरगुती कारणावरून सुरू झालेला वाद विकोपाला गेल्यानंतर वडील आणि मुलगा यांच्यात हाणामारीला सुरुवात झाली. ते दोघंही एकमेकांना मारू लागले होते. या मारामारीत मुलाने मारलेल्या कानाखालीमुळे वडिलांचा जागीच मृत्यू झाला.
मिळालेल्या माहितीनुसार, राजस्थानच्या डुंगरपूर भागात ही भयंकर घटना घडली आहे. 60 वर्षांच्या पूंजा कटारा यांचे त्यांचा मुलगा प्रकाश कटारा याच्यासोबत सतत वाद होत असत. छोट्या मोठ्या कारणावरून झालेले हे वाद विकोपाला गेल्यावर दोघांमध्ये अधूनमधून हाणामारीदेखील होत असे. असाच घटनेच्या दिवशी घरगुती कारणावरून वाद सुरू झाला आणि काही मिनिटांतच तो विकोपाला गेला. वडील आणि मुलगा यांच्यात काही वेळ हाणामारी झाली. त्यावेळी संतापलेल्या मुलाने वडिलांना एक कानशिलात लगावली. त्यामुळे चक्कर येऊन ते कोसळले आणि त्यानंतर त्यांचा मृत्यू झाला.
वडिलांचा जागीच मृत्यू
मुलगा आणि वडील यांच्य़ामध्ये झालेलं घरगुती भांडण पाहण्यासाठी शेजाऱ्यांनी तसेच गावकऱ्यांनी मोठी गर्दी केली होती. पूंजा कटारा यांचा मृत्यू झाल्याची माहिती शेजाऱ्यांनीच तातडीने पोलिसांना दिली. घटनेची माहिती मिळताच पोलिसांनी घटनास्थळी दाखल होत मृतदेह ताब्यात घेऊन पोस्टमॉर्टेमसाठी पाठवून दिला आहे. वडिलांना कानाखाली मारून त्यांचा जीव घेणाऱ्या मुलाविरोधात सदोष मनुष्यवधाचा गुन्हा दाखल करण्यात आला आहे. या घटनेने परिसरात एकच खळबळ उडाली आहे. पोलीस या प्रकरणाचा अधिक तपास करत आहेत. एका हिंदी वेबसाईटने याबाबतचे वृत्त दिले आहे.