बंगळुरू - बंगळुरूमध्ये एक धक्कादायक घटना घडली आहे. बंगळुरूमधील एका डॉक्टराने केलेली एक गंमत त्याच्या जीवावर बेतली. या डॉक्टराने गमती गमतीमध्ये होणाऱ्या पत्नीचा एक न्यूड फोटो सोशल मीडियावर अपलोड केला. एवढंच नाही तर तो फोटो मित्रांसोबतही शेअर केला. त्यामुळे संतप्त झालेल्या या डॉक्टराच्या होणाऱ्या पत्नीने तीन मित्रांसोबत मिळून या डॉक्टराची हत्या केली.
मिळालेल्या माहितीनुसार मुळचा चेन्नईतील असलेला डॉक्टर विकास राजन येथील बीटीए लेआऊट परिसरामध्ये राहायचा. त्याच्यावर १० सप्टेंबर रोजी रात्री हल्ला करण्यात आला. त्याची होणारी पत्नी आणि तिच्या दोन सहकाऱ्यांनी मिळून हा हल्ला केला होता. आरोपी बीटीएम लेआऊट येथे राहणारे आहेत. पोलिसांनी त्यांना अटक केली आहे. त्यानंतर पोलीस एक अन्य आरोपी सूर्या याच्या तपासात गुंतले आहेत.
विकासच्या मोठ्या भावाने दिलेल्या तक्रारीवरून पोलिसांनी संशयितांविरोधात हत्येच्या प्रयत्नाचा गुन्हा दाखल करून तपास सुरू केला होता. त्यानंतर या हत्याकांडाचा उलगडा झाला. मृत विकास हा सदर महिलेसोबत दोन वर्षांपासून रिलेशनमध्ये होता. त्यांचा साखरपुडाही झाला होता.
दरम्यान, विकासने सोशल मीडियावर मित्राच्या नावाने अकाऊंट उघडून त्यावर होणाऱ्या पत्नीचे काही न्यूड फोटो अपलोड केले. त्याबरोबरच ते आपल्या काही मित्रांनाही पाठवले. या महिलेने इन्स्टाग्रामवर हे फोटो पाहिले तेव्हा तिला धक्का बसला. तिने विकासकडे विचारणा केली तेव्हा त्याने केवळ गंमत म्हणून आपण तसं केल्याचं सांगितलं. मात्र त्यावरून या दोघांमध्ये वाद झाला. त्यानंतर या महिलेने विकासला अद्दल घडवण्यासाठी मित्रांसोबत एक प्लॅन आखला. त्यांना विकासला जीवे मारायचे नव्हते. पण त्यांनी केलेल्या मारहाणीत विकास गंभीर जखमी झाला. ते त्याला रुग्णालयात घेऊन गेले. मात्र तिथे त्याचा मृत्यू झाला.