एखाद्या गोष्टीचा बदला घेण्यासाठी काही लोक वाटेल ते करतात. अशीच एक धक्कादायक घटना आता समोर आली आहे. एका विद्यार्थ्याने तब्बल 30 वर्षांनी अपमानाचा बदला घेतला आहे. बेल्जियम राहणाऱ्या एका व्यक्तीने शिक्षिकेने 30 वर्षांपूर्वी केलेल्या अपमानाचा बदला घेण्यासाठी तिची हत्या केल्याची एक घटना समोर आली आहे. 37 वर्षीय आरोपीने या हत्येची कबुली दिली आहे. 2020 मध्ये या व्यक्तीने प्राथमिक शाळेत आपली शिक्षिका राहिलेल्या महिलेची हत्या केली होती. बेल्जियममध्ये ही घटना घडली असून वकिलांनी याची माहिती दिली.
गुंटर यूवेंट्स असं या आरोपीचं नाव आहे. त्याने दिलेल्या माहितीनुसार, शिक्षिका मारिया वेरलिंडेन यांनी 1990 मध्ये आपल्यावर केलेली कमेंट विसरू शकलो नव्हतो. त्यावेळी आपण फक्त सात वर्षांचे होतो. 2020 मध्ये 59 वर्षीय मारिया यांची त्यांच्या घऱात हत्या झाली होती. बेल्जियम पोलिसांनी हजारो लोकांचे डीएनए नमुने घेत तपास केल्यानंतरही हत्येचा उलगडा होत नव्हता. मारिया यांच्या पतीने लोकांना साक्षीदार असल्याच पुढे येण्याचं आवाहन केलं होतं. पण काही केल्या हल्लेखोराचा शोध लागत नव्हता.
स्थानिक प्रसारमाध्यमांनुसार, 101 वेळा भोसकून मारिया यांची हत्या करण्यात आली होती. त्यांच्या पाकिटात असणाऱ्या पैशांना हात लावला नसल्याने चोरीच्या उद्धेशाने हत्या झाली नसल्याचं स्पष्ट होतं. हत्येच्या 16 महिन्यांनी 20 नोव्हेंबरला आरोपीने आपल्या मित्राला हत्या केल्याचं सांगितलं. यानंतर त्याने पोलिसांना याची माहिती दिली. अखेर रविवारी पोलिसांनी त्याला बेड्या ठोकल्या. पोलिसांनी घटनास्थळी सापडलेल्या डीएनए नमुन्यांची आणि आरोपीच्या नमुन्यांची तपासणी केली आहे.
आरोपीने हत्येची कबुली दिली असून सविस्तर माहिती सांगितल्याचं सरकारी वकिलांनी म्हटलं आहे. प्राथमिक शाळेत असताना शिक्षिकेमुळे आपल्याला खूप सहन करावं लागलं असं त्याचं म्हणणं आहे. तपासादरम्यान याची चाचपणी केली जाईल असं सरकारी वकिलांनी सांगितलं आहे. अटक केल्यानंतर आरोपीला न्यायाधीशांसमोर हजर करण्यात आलं. या घटनेने एकच खळबळ उडाली आहे. एका हिंदी वेबसाईटने याबाबतचे वृत्त दिले आहे.