नवी दिल्ली - आंध्र प्रदेशमध्ये एक धक्कादायक घटना घडली आहे. एका भामट्याने घटस्फोटाच्या बोगस प्रमाणपत्राच्या आधारे एक, दोन नव्हे तर तब्बल सात जणींशी विवाह केल्याची घटना समोर आली आहे. श्रीमंत आणि घटस्फोटीत महिलांना लक्ष्य करून त्याने त्यांना लाखोंचा गंडा घातला. आश्चर्याची बाब म्हणजे त्याच्या सात पत्नींपैकी तिघीजणी एकाच कॉलनीत राहत होत्या. मात्र आपला पती एकच असल्याची कल्पना त्यांना नव्हती. फसवणूक झालेल्या महिलांपैकी बहुतेक जणी हैदराबादच्या रहिवासी आहेत. त्या उच्चशिक्षित असून चांगल्या ठिकाणी नोकरीला आहेत. यापैकी दोघींनी सोमाजीगुडा प्रेस क्लबमध्ये पत्रकार परिषद घेत त्यांच्यासोबत घडलेला प्रकार सांगितला.
पोलिसांनी दिलेल्या माहितीनुसार, अदापा शिवशंकर बाबू असं आरोपीचं नाव असून तो आंध्रप्रदेशच्या गुंटूर जिल्ह्यातील बेतापुडी गावचा रहिवासी आहे. त्याने इंजिनीयरिंग केलं आहे. मॅट्रिमॉनियल साईट्सवर दुसऱ्या लग्नासाठी नोंदणी केलेल्या महिलांना शिवशंकर लक्ष्य करायचा. आपण घटस्फोटीत असून आपल्याला एक मुलगीदेखील असल्याचं तो महिलांना सांगायचा. त्यांना घटस्फोटाचं प्रमाणपत्रदेखील दाखवायचा. आपण एका आयटी कंपनीत कामाला असून आपल्याला महिन्याला 2 लाख रुपये पगार असल्याची बतावणी शिवशंकर करायचा. त्यामुळे घटस्फोटित महिलांचे कुटुंबीय हुंडा देऊन त्यांच्या मुलींचा विवाह शिवशंकरशी करून द्यायचे.
लग्नानंतर शिवशंकर त्याच्या पत्नीला नोकरी सोडण्यास सांगायचा. कंपनी आपल्याला प्रोजेक्टसाठी अमेरिकेला पाठवणार असल्याची बतावणी करत शिवशंकर पत्नीच्या कुटुंबाकडून लाखो रुपये घ्यायचा. त्यानंतर अमेरिकेचा दौरा रद्द झाल्याची थाप मारायचा. कुटुंबानं पैसे परत करण्यास सांगितल्यास टाळाटाळ करायचा. पीडित तरुणीपैकी एकीने या प्रकरणी रामचंद्रपुरम पोलीस ठाण्यात तक्रार नोंदवली. पोलिसांनी शिवशंकरला चौकशीसाठी बोलावलं. त्यांच्यासमोर शिवशंकर वेगळ्याच महिलेला घेऊन आला आणि ती आपली पत्नी असल्याचा दावा केला.
दोन्ही महिलांनी एकमेकींचे नंबर घेतले. त्यांनी एकमेकींशी संपर्क साधल्यानंतर त्यांना सत्य समजलं. दोघींनी सारख्याच पद्धतीनं फसवण्यात आलं होतं. शिवशंकरच्या दुसऱ्या पत्नीनं तिच्या लहान भावंडांना त्याच्यावर नजर ठेवण्यास सांगितली. एकाच कॉलनीमध्ये शिवशंकरचे तीन महिलांशी संबंध असल्याचं त्यांच्या लक्षात आलं. दोन पत्नींना आपल्याबद्दलची खरी माहिती समजल्याचं लक्षात येताच शिवशंकर फरार झाला. त्यानंतर दोन महिलांनी आणखी माहिती शोधण्याचा प्रयत्न केला. तेव्हा शिवशंकरनं एकूण सात जणींशी लग्न केल्याचं त्यांच्या लक्षात आलं. एका हिंदी वेबसाईटने याबाबतचे वृत्त दिले आहे.