जयपूर - राजस्थानमधील कोटा शहरातील कर्बला परिसरात एका दीड वर्षांच्या बालकाचा मृतदेह पाण्याच्या टाकीत संशयास्पद अवस्थेत सापडल्याने खळबळ उडाली आहे. या पाण्याच्या टाकीवर झाकण लावलेले होते. हा मुलगा तिथे कसा काय पोहोचला, याबाबत माहिती अद्याप मिळू शकलेली नाही. त्यातच मुलाच्या कुटुंबीयांनी पोलिसांना माहिती न देता परस्पर मृतदेह दफन केल्याने संशय बळावला आहे. मृत मुलाच्या आजोबांनी मुलाची हत्या झाल्याचा दावा केला आहे. त्यानंतर अज्ञात व्यक्तींविरोधात हत्येचा गुन्हा दाखल करण्यात आला आहे. तसेच या प्रकरणात मृत मुलाचे कुटुंबीय संशयाच्या फेऱ्यात सापडले आहेत.
पोलिसांनी दिलेल्या माहितीनुसार मृत मुलगा खेळत असताना अचानक बेपत्ता झाला. खूप शोध घेतल्यानंतरही तो सापडला नाही. अखेर सोमवारी संध्याकाळी त्याचा मृतदेह घराच्या दुसऱ्या मजल्यावरील टाकीमध्ये सापडला. धक्कादायक बाब म्हणजे टाकीवर झाकण लावलेले होते. त्यामुळे संशय बळावला आहे. त्याचा मृतदेह बाहेर काढून कुटुंबीयांनी रुग्णालयात धाव घेतली. तिथे डॉक्टरांनी त्याला मृत घोषित केले. त्यानंतर पोलिसांना न सांगता कुटुंबीयांनी मृतदेहाची परस्पर विल्हेवाट लावली.
प्राथमिक तपासामध्ये मृत अबीरचे वडील इम्रान हे नगरपालिकेमध्ये कामाला असल्याचे समोर आले. त्यांनी सांगितले की, त्यांचे ९ भावांचे कुटुंब आहे. दोघेजण एका घरात राहतात. तर बाकीचे ७ जण समोरच्या घरात राहतात. माझा मुलगा सोमवारी बेपत्ता झाला होता. खूप शोध घेऊनही तो सापडला नाही. त्यानंतर त्याचा मृतदेह टाकीमध्ये सापडला. त्यानंतर त्याच्यावर अंत्यसंस्कार केले. दरम्यान, मृत मुलाचे आजोबा सईद यांनी त्याची हत्या झाल्याची शंका व्यक्त केली होती.