कोलकाता - पश्चिम बंगालमधील हावडा येथून एक धक्कादायक घटना समोर आली आहे. येथे मधुचंद्राची रात्र संपताच नववधूच्या डोक्यावरील कुंकू पुसला गेला. सकाळीच नवऱ्याचा मृतदेह गळफास घेतलेल्या अवस्थेत सापडला. ही घटना बी. गार्डन ठाण्यांतर्गत शालीमार परिसरातील आहे. या घटनेनंतर कुटुंबाच शोकाचे वातावरण आहे. तर कुटुंबीय आणि पोलीस आत्महत्येमागच्या कारणाचा शोध घेत आहेत.
पोलिसांनी सांगितले की, प्राथमिक तपासामध्ये ही घटना आत्महत्येची दिसत आहे. पोस्टमार्टेम रिपोर्ट आल्यानंतर मृत्यूच्या खऱ्या कारणांचा शोध लागणार आहे. मात्र सध्यातरी वराच्या मृत्यूच्या कारणाबाबतचं गुढ अद्याप कायम आहे. नववधूलाही या घटनेमुळे मोठा धक्का बसला आहे. मधुचंद्राच्या रात्री असे काय घडले ज्यामुळे तिच्या पतीने जीवन संपवले, असा प्रश्न तिला पडला आहे. दरम्यान, पोलीस याबाबत कुटुंबीयांचा जबाब घेत आहेत.
शालीमारनगरमधील आदर्श साव याचा विवाह बॅरकपूरमधील तरुणीशी झाला होता. बुधवारी वरात घरी पोहोचली. गुरुवारी मधुचंद्र आणि शुक्रवारी भोजनाचा कार्यक्रम होता. मात्र शुक्रवारी सकाळी नववधू आंघोळ करून खोलीत आली तेव्हा तिने पतीला गळफास घेतलेल्या अवस्थेत पाहिले आणि एकच खळबळ उडाली.
त्याला खाली उतरवून रुग्णालयात नेण्यात आले. मात्र डॉक्टरांनी त्याला मृत घोषित केले. नववधूने सांगितले की, लग्न ठरल्यानंतर गेल्या सहा महिन्यांपासून ते दोघेही संपर्कामध्ये होते. तसेच रोज फोनवरून बोलायचे. आम्हा दोघांनाही लग्नाचे वेध लागले होते. तसेच रोज फोनवरून बोलणेही होत होते. सर्व काही व्यवस्थित सुरू होते. मात्र शुक्रवारी सकाळी असे काय घडले ते मला समजत नाही आहे. माझं जग वसण्याआधीच उद्ध्वस्त झालंय.
दरम्यान, या घटनेचा गांभीर्याने तपास सुरू आहे. तसेच लवकरच त्याचा उलगडा केला जाईल, असे पोलिसांनी सांगितले. पोलिसांकडून आजूबाजूच्या तसेच नातेवाईकांकडे चौकशी केली जात आहे. पोस्टमार्टमनंतर मृतदेह अंत्यसंस्कारासाठी पाठवला जाईल. पोलीस अनेक पैलूंकडे लक्ष ठेवून तपास करत आहेत.