मुंबई - बॉलिवूडमधील एका प्रसिद्ध अभिनेत्रीची मोठी फसवणूक झाल्याची धक्कादायक घटना समोर आली आहे. या अभिनेत्रीला कथित इन्वेस्टमेंटच्या नावाखाली सुमारे सव्वा चार कोटींचा गंडा घालण्यात आला. हा प्रकार समोर आल्यानंतर सर्वांनाच धक्का बसला आहे. या फसवणुकीनंतर अभिनेत्रीने पोलिसांकडे तक्रार दाखल केली आहे. तसेच खार पोलिसांनीही आरोपीला पकडण्यासाठी शोध सुरू केला आहे.
या अभिनेत्रीसोबत कथितपणे फसवणुकीचा प्रकार समोर आला आहे. खार पोलिसांनी हल्लीच सांगितले की, बॉलिवूड अभिनेत्री रिमी सेन हिने गोरेगावमधील एक व्यावसायिक रौनक जतीन व्यास यांच्याविरोधात गुंतवणुकीच्या नावाखाली कथितपणे ४.१४ कोटी रुपयांची फसवणूक केल्याच्या आरोपाखाली पोलिसांमध्ये तक्रार दिली आहे. त्यानंतर आयपीसी कलम ४२० आणि ४०९ अंतर्गत गुन्हा दाखल करण्यात आला आहे. तसेच आरोपीला पकडण्यासाठी शोधमोहीम सुरू करण्यात आली आहे.
रिमी सेन हिने हंगामा, धूम, बागबान, गोलमालसारख्या चित्रपटांमध्ये भूमिका केल्या होत्या. मात्र तिला खरी ओळख विनोदी चित्रपटांमधून मिळाली होती. ती तिचं सौंदर्य आणि फिट बॉडीसाठीही प्रसिद्ध होती. मात्र सातत्याने हिट चित्रपट केल्यानंतरही रिमी सेन हिने बॉलिवूडला रामराम ठोकला. चित्रपटसृष्टीपासून दूर जाऊन तिला दहा वर्षांहून अधिक काळ लोटला आहे.
तिने एका मुलाखतीत सांगितले की, चित्रपटांमध्ये ग्लॅमरस प्रॉपची भूमिका करू मी थकले होते. हे खूपच कंटाळवाणे होते. दरम्यान, तिला एकवेळ केवळ विनोदी चित्रपटच ऑफर केले जात होते. तिने फिर हेराफेरी, हंगामा आणि गोलमालसारख्या चित्रपटात काम केले होते. एकसारख्या भूमिका करून ती थकली होती. तिच्यामते त्यावेळी संपूर्ण इंडस्ट्री मेल डॉमिनेटिंग होती. अभिनेत्री केवळ सहाय्यक भूमिकेत असायच्या. त्यामुळे एकसारख्या भूमिका करण्यापेक्षा मला इंडस्ट्री सोडणे योग्य वाटले.