नवी दिल्ली - प्रेमाला वयाचं बंधन नसतं असं म्हणतात. अशीच एक घटना आता समोर आली आहे. एका मुलाने आपल्या वडिलांचा तब्बल 800 किलोमीटर पाठलाग करून त्यांच्या प्रेमप्रकरणाची पोलखोल केल्याची घटना समोर आली आहे. उज्जैनमध्ये प्रेयसीसोबत असलेल्या वडिलांना त्यांच्या मुलाने रंगेहाथ पकडलं आणि एकच गोंधळ झाला. या घटनेनंतर वडील ज्या हॉटेलमध्ये थांबले होते तिथून त्यांना बाहेर काढण्यात आलं. खूप वेळ लोकांना फॅमिली ड्रामा पाहायला मिळाला. मुलाने आपल्या वडिलांचा एक व्हिडीओ देखील काढला असून सध्या तो सोशल मीडियावर जोरदार व्हायरल होत आहे.
मिळालेल्या माहितीनुसार, वडिलांना रंगेहाथ पकडण्यासाठी मुलगा ग्वाल्हेरवरून जयपूर आणि जयपूरवरून उज्जैनपर्यंत पोहोचला होता. 62 वर्षीय आलोक चौधरी हे एका खासगी कंपनीत काम करतात. त्याचं एका 59 वर्षीय महिलेसोबत अफेअर होतं. फेसबुकवर या दोघांची मैत्री झाली होती. पुढे या मैत्रीचं रुपांतर प्रेमात झालं. आलोक चौधरी यांच्या पत्नीला पतीच्या प्रेमप्रकरणाचा संशय आला होता. तिने मुलाला वडिलांवर लक्ष ठेवायला सांगितलं. वडील कामानिमित्त बाहेर जाणार असल्याचं समजल्यानंतर पत्नीला आणखी संशय आला आणि तिने आपल्या मुलाला त्यांचा पाठलाग करायला सांगितलं.
मुलाने दोघांना रंगेहाथ पकडलं
मुलानं दिलेल्या माहितीनुसार त्याचे वडील अगोदर जयपूरला गेले. जयपूरवरून त्यांनी ट्रेन पकडली आणि प्रेयसीला घेऊन ते उज्जैनला गेले. उज्जैनमधील महाकाल मंदिरासमोरच्या हॉटेलमध्ये त्यांनी एक रुम बुक केली आणि तिथं एकत्र राहू लागले. त्यानंतर मुलानं दोघांना रंगेहाथ पकडलं. वडिलांचं प्रेमप्रकरण असल्याचा आईला संशय होता. आपल्या आईसाठी आपण हे काम केल्याचं त्यानं सांगितलं. या वयात वडिलांचं प्रेमप्रकरण समोर आल्यामुळे धक्का बसल्याचं त्यानं म्हटलं आहे.
व्हिडीओ सोशल मीडियावर जोरदार व्हायरल
जेव्हा आपल्याला पहिल्यांदा याबाबत समजलं, तेव्हा आपला विश्वास बसत नव्हता. मात्र आईच्या शंकेचं निरसन करण्यासाठी आपण वडिलांचा पाठलाग सुरू केल्याचं मुलाने सांगितलं. आलोक चौधरी हे पत्नीवरच संशय घ्यायचे आणि घटस्फोटासाठी दबाव टाकत होते. याच दरम्यान त्यांची एका महिलेसोबत ओळख झाली आणि प्रेमप्रकरण सुरू झाल्याची माहिती मुलांनी दिली आहे. सध्या या प्रकरणाचा एक व्हिडीओ सोशल मीडियावर जोरदार व्हायरल होत आहे. एका हिंदी वेबसाईटने याबाबतचे वृत्त दिले आहे.