मध्य प्रदेशातील जबलपूर जिल्ह्यात नात्याला काळीमा फासणारी एक घटना घडली आहे. दोन सख्ख्या भावांनी आपल्या चुलत बहिणीवर बलात्कार केल्याची संतापजनक घटना समोर आली आहे. अल्पवयीन मुलीला बेदम मारहाण करून तिचा जीव घेतला आहे. धक्कादायक बाब म्हणजे पीडितेची आजी तिच्या मदतीला आली असता, तिच्यावरही एकाने बलात्कार केला आहे. या घटनेने परिसरात खळबळ उडाली आहे.
पोलिसांनी दिलेल्या माहितीनुसार, पीडिता मुंबईमध्ये राहते. मात्र 11 ऑगस्ट रोजी काही दिवसांसाठी जबलपूर येथे तिच्या काकांच्या घरी गेली होती. काही दिवसांनी तिच्या दोन चुलत भावांनी तिच्यावर बलात्कार केला. 19 ऑगस्ट रोजी एका खासगी रुग्णालयात तिला उपचारासाठी दाखल करण्यात आले. मात्र त्यापूर्वी तिच्या भावांकडून तिच्यावर लैंगिक अत्याचार, बलात्कार आणि मारहाण झाल्याचा आरोप मीडिया रिपोर्ट्समध्ये करण्यात आला आहे. त्यानंतर दुसऱ्याच दिवशी तिचा मृत्यू झाला.
जबलपूरचे एएसपी प्रदीप कुमार यांनी दिलेल्या माहितीनुसार, मंगळवारी पीडितेच्या वडिलांनी पोलिसांना सांगितले की, त्यांच्या मुलीवर तिच्या दोन चुलत भावांनी बलात्कार केला आणि तिला मारहाण केली. तिच्या मदतीसाठी धावून आलेल्या आपल्या आईवर (पीडितेची आजी) एका आरोपीने बलात्कार केल्याचा आरोप पीडितेच्या वडिलांनी केला आहे.
पीडितेच्या चुलत भावांवर भारतीय दंड संहिता आणि पॉक्सो (POCSO) कायद्याच्या संबंधित कलमांनुसार बलात्काराचा आरोप ठेवण्यात आला आहे. यातील एका आरोपीला अटक करण्यात आली आहे, तर दुसरा फरार आहे. या प्रकरणी अधिक तपास सुरू असून पीडितेवर उपचार करणाऱ्या खासगी रुग्णालयातील कर्मचाऱ्यांची पोलीस सध्या चौकशी करत आहेत. एका हिंदी वेबसाईटने याबाबतचे वृत्त दिले आहे.