अंडरवर्ल्ड डॉन छोटा राजनची सीबीआय न्यायालयाने एका खटल्यात निर्दोष मुक्तता केली आहे. मुंबई अंडरवर्ल्डमध्ये डॉन दाऊद इब्राहिम कासकरचा सर्वात मोठा दुश्मन म्हटल्या जाणाऱ्या छोटा राजनच्या गुन्हेगारी आयुष्यातील हा पहिला एफआयआर होता. 1983 मध्ये त्याने पोलिस अधिकाऱ्यावर जिवघेणा हल्ला केला होता. छोटा राजनच्या विरोधातील हा पहिला मोठा गुन्हा होता.
छोटा राजन तेव्हा दारु तस्करी करत होता. छोटा राजनचे वकील तुषार खंडारे यांनी सांगितले की, हे प्रकरण 1983 मध्ये नोंद झाले होते. एका टॅक्सीतून छोटा राजन आणि त्याचे साथीदार दारुची तस्करी करत होते. तेव्हा टिळक नगर पोलिस स्टेशनच्या एका गस्तीवरील पथकाने त्यांना रोखण्याचा प्रयत्न केला. या पथकामध्ये दोन पोलिस अधिकारी आणि चार कॉन्स्टेबल होते. तर राजनच्या कारमध्ये दोन अन्य साथीदार होते.
पोलिसांनी राजनची टॅक्सी थांबविली. तेव्हा राजनने चाकू काढून पोलीस अधिकाऱ्यावर हल्ला केला. मात्र, पोलिसांनी त्याला आणि त्याच्या एका साथीदाराला ताब्यात घेतले. तर दुसरा साथीदार पळून गेला. राजनसोबत अटक झालेल्या साथीदाराला न्यायालयाने सोडले होते तर राजनविरोधात गुन्हा सुरु होता. तो जामिनावर बाहेर आला होता. राजनला 2015 मध्ये इंडोनेशिया येथून ताब्यात घेण्यात आले आहे. या काळात मुंबई पोलिसांनी हा खटला सीबीआयच्या ताब्यात दिला. सीबीआयने फायनल क्लोजर रिपोर्ट लावत म्हटले होते की केस खूप जुनी आहे. तसेच याबाबत कोणताही साक्षीदार आणि पुरावा सापडत नाहीए. हल्ल्यात वापरलेला चाकूदेखील गायब झाला आहे. यावर न्यायालयाने हा रिपोर्ट फेटाळला होता. परंतू आता राजनची या खटल्यातून मुक्तता करण्यात आली आहे.