मीरारोड - एका तरुणास कॉल करायचा सांगून त्याचा मोबाईल घेत बोलणाऱ्या भामट्याने त्या तरुणास पाण्याची बाटली आणायला पाठवत मोबाईल घेऊन पळून गेल्याची घटना भाईंदरमध्ये घडली आहे . मदत करायला गेला आणि मोबाईल गमावून बसला अशी पाळी तरुणावर आली आहे .
भाईंदर पोलीस ठाण्या मागील शास्त्री नगर मध्ये राहणारा करण कानु (२०) हा गुरुवारी सायंकाळी कामावरून घरी जेवणासाठी पायी चालला होता . त्यावेळी राजेश हॉटेल जवळ एका अनोळखी इसमाने त्याला हाक मारत टेम्पोतील सामान काढायचे असून बिगारी ओळखीचा आहे का विचारले . करण याने त्याच्या भागातील एका बिगारीला कॉल करून येण्यास सांगितले . दरम्यान त्या इसमाने एका नंबरवर कॉल लाव सांगितले असता करण याने कॉल लावून मोबाईल त्याला दिला . बोलता बोलता त्या इसमाने पाण्याची बाटली घेऊन ये सांगून ५० रुपये दिले असता करण पाणी आणण्यास गेला . बाटली घेऊन परतला असता तो इसम दिसला नाही . त्याचा शोध घेऊन देखील तो न सापडल्याने १५ हजारांचा मोबाईल पळवल्या प्रकरणी अनोळखी इसमा विरुद्ध भाईंदर पोलिसांनी गुन्हा दाखल केला आहे .