शहीद कर्नलच्या घरात रक्ताचा खेळ; आईनेच रचला मुलाच्या हत्येचा कट, धक्कादायक कारण समोर!

'अर्जुन मर्डर केस'चा पोलिसांनी उलगडा केला असून, या हत्येमागे अर्जुनची आई बीना शर्मा हिचाच हात असल्याचे समोर आले आहे.

ज्या आईने जन्म दिला, तिनेच आपल्या पोटच्या मुलाच्या मृत्यूचा कट रचल्याची धक्कादायक घटना उत्तराखंडची राजधानी डेहराडूनमध्ये घडली आहे. 'अर्जुन मर्डर केस'चा पोलिसांनी उलगडा केला असून, या हत्येमागे अर्जुनची आई बीना शर्मा हिचाच हात असल्याचे समोर आले आहे. गॅस एजन्सी, बँकांचे कोटींचे कर्ज आणि वडिलोपार्जित संपत्तीचा वाद यातून एका मातेने सुपारी देऊन आपल्या मुलाचा काटा काढला.

१२ लाखांत ठरला सौदा; २५ दिवसांपासून रचले जात होते जाळे

पोलीस तपासात समोर आलेल्या माहितीनुसार, अर्जुनची हत्या करण्याची योजना गेल्या २५ दिवसांपासून आखली जात होती. आई बीना शर्मा, तिचा जवळचा साथीदार विनोद उनियाल आणि प्रॉपर्टी डीलर अजय खन्ना यांनी मिळून अर्जुनला संपवण्याचा कट रचला. यासाठी त्यांनी पंकज राणा नावाच्या सुपारी किलरला १२ लाख रुपये दिले. पंकजने त्याचा गुन्हेगारी पार्श्वभूमी असलेला भाऊ राजीव यालाही या कामात सामील करून घेतले. या दोघांनी अनेक दिवस अर्जुनची रेकी केली आणि संधी मिळताच तिबेटी मार्केटजवळ त्याची गोळ्या झाडून हत्या केली.

आई आणि मुलाच्या नात्यात मिठाचा खडा का पडला?

अर्जुन आणि त्याची आई बीना यांच्यातील वाद आजचा नव्हता. शहीद कर्नल रमेश चंद शर्मा यांच्या निधनानंतर कुटुंबाला गॅस एजन्सी मिळाली होती. सुमारे १५ वर्षांपूर्वी जेव्हा अर्जुनने या कामात लक्ष घालण्यास सुरुवात केली, तेव्हापासून माय-लेकात खटके उडू लागले. बीना शर्मा या कुटुंबाबाहेरील व्यक्तींना व्यवसायातील पैसे देत होत्या, ज्याला अर्जुनचा तीव्र विरोध होता.

८ कोटींचे कर्ज आणि १४ कोटींचा सौदा

या हत्येमागे मुख्यत्वे दोन आर्थिक कारणे होती, ती म्हणजे कुटुंबाने गॅस एजन्सीसाठी बँकेकडून घेतलेले ८ कोटींचे कर्ज आणि जीएमएस रोडवरील वडिलोपार्जित मालमत्तेचा सौदा. आई बीना यांनी ही मालमत्ता डॉ. अजय खन्ना यांना १४ कोटी रुपयांना विकली होती. यातील ४ कोटी बँकेचे कर्ज फेडण्यासाठी वापरले गेले, तर उरलेले ८ कोटी बीना यांनी आपल्या खात्यात जमा होताच दुसऱ्याच दिवशी विनोद उनियालला ट्रान्सफर केले.

मुलाने कोर्टातून आणला होता 'स्टे'

आपल्या हक्काच्या संपत्तीची अशा प्रकारे विल्हेवाट लावली जात असल्याचे पाहून अर्जुन संतापला होता. त्याने या मालमत्तेच्या व्यवहारावर न्यायालयातून स्थगिती आणली होती. यामुळे व्यवहार अडकला आणि डॉ. खन्ना यांच्यावर पैसे परत करण्याचा दबाव वाढला. हाच दबाव आणि संपत्तीचा लोभ यातून आईने मुलालाच कायमचे संपवण्याचा टोकाचा निर्णय घेतला. या घटनेने केवळ डेहराडूनच नव्हे तर संपूर्ण देश हादरला आहे. ज्या बापाने देशासाठी बलिदान दिले, त्यांच्याच घरात संपत्तीसाठी रक्ताचे नाते रक्ताचे तहानलेले झाले, हे पाहून हळहळ व्यक्त होत आहे.