पूनम अपराज
जुहू चौपाटीवर एकेकाळी वडिलांसोबत भेळ विकणारा, चौथी शिकलेल्या बद्रीमंडलला (२५) डी. बी. मार्ग पोलिसांनी जामतारा येथून बेड्या ठोकल्या आहेत. त्याने पेटीएमद्वारे लॅमिंटन रोडवरील व्यापाऱ्याला लाखोंचा गंडा घातला होता. झारखंडमधील जामतारा जिल्ह्यात या आरोपीची अमाप करोडोची संपत्ती असल्याचे पोलीस तपासात आढळून आले. बद्रीमंडल हा चौथी शिकलेला आरोपी सायबर क्राईममधला मास्टरमाइंड आहे. जामतारा जिल्ह्यातील तरुणांना यानेच सायबर क्राईमचे धडे गिरवायला शिकवले अशी पोलिसांनी माहिती दिली.
अंधेरीतील जुहू चौपाटीवर वडिलांसोबत भेळ विकणारा बद्रीमंडल. काही दिवसांनी आपल्या मूळगावी जामतारा येथे गेला. चौथी शिकलेले केवळ स्वतःच्या नावाची सही कारण्यापुरतं लिहिता येतं, तरीदेखील सायबर क्राईम करण्यात एक नंबर असलेल्या बद्रीमंडलने डिसेंबर २०१९ मध्ये ऑटो स्पेअर पार्ट विकणारे व्यवसायिक आणि ज्येष्ठ नागरिक असलेल्या नागरिकाला केवायसी अपडेट करण्याच्या नावाखाली फसवा कॉल केला आणि टीम व्युव्हर ऍपच्या माध्यमातून त्याने व्यवसायिकाचा ओटीपी मिळवून त्यांचा मोबाईल ऍक्सेस आपल्या मोबाईलवर घेऊन १ लाख ७० हजारांना गंडा घातला. ताबडतोब आलेले पैसे बद्रीमंडलने राजस्थानच्या अरविंद पुरोहितला पाठवले आणि अरविंदने मुंबईत सुतार काम करणाऱ्या पुखराजला ते पैसे वळते केले. पुखराजने घाटकोपर येथील एका मॉलमध्ये जाऊन ४० हजारांचे ४ आणि १० हजारचा १ असे पाच मोबाईल खरेदी केले.
राजस्थानहून आलेले संपत सुतार, करसी सुतार आणि पुखराज सुतार यांना डी. बी. मार्ग पोलिसांनी जानेवारी २०२० ला जेरबंद केलं. त्यांच्याकडून ७४ मोबाईल हस्तगत करण्यात आले आणि वरळी परिसरात हे वास्तव्य करत होते. सुतार बंधू हे मोबाईल खरेदी करण्यासाठी मॉलमध्ये गेले होते. त्यामुळेच बद्रीमंडलचे बिंग फुटले. या प्रकरणात अरविंद पुरोहित हा आरोपी अद्याप फरार आहे.
ब्लॅकआऊट करुन सराईत दरोडेखोरांचा दरोडा, सीसीटीव्ही फुटेजवरही मारला डल्ला
मुख्य आरोपी बद्रीमंडल हा सायबर क्राईममध्ये कुर्ला, एमआयडीसी आणि डी. बी. मार्ग पोलिसांसाठी वॉन्टेड आरोपी होता. अखेर त्याचा ठावठिकाणा लागला. नंतर मुंबई पोलिसांचे पथक जामतारातीळ बद्रीमंडलच्या गावात धडकले आणि त्यांनी बद्रीमंडलला बेड्या ठोकून डी. बी. मार्ग पोलीस ठाण्यात घेऊन आले.
एमआयडीसी पोलीस ठाण्याच्या पथकावर जामतारा गावात बद्रीमंडलला पकडताना गावकऱ्यांनी किरकोळ दगडफेक केली, सुदैवाने पोलिसांना दुखापत झाली नाही. मात्र, बद्रीमंडलला पकडणं खूप अवघड होतं असं डी. बी, मार्ग पोलीस ठाण्याचे पोलीस निरीक्षक राजा बिडकर आणि पोलीस उपनिरीक्षक प्रदीप पाटील यांनी लोकमतशी बोलताना सांगितलं. बद्रीमंडल याने सायबर क्राईम करून करोडोची माया जमवली. त्याच्याकडे स्पोर्ट युटिलिटी व्हेहिकल (एसयूव्ही) गाडी आणि बुलेट असून गावात आलिशान घर आहे. याआधी देखील बद्रीमंडलला कफपरेड पोलिसांनी अटक केली होती. त्यानंतर तो जामिनावर सुटून पुन्हा सायबर क्राईम करत होता. एकूण २५ गुन्हे त्याच्यावर दाखल आहेत.
जामताराची सायबर गुन्ह्यांचं हब म्हणून कुप्रसिद्ध
झारखंडमधील संथाल परगणा परिसरातील जामतारा हे गाव, रांचीपासून जवळपास २५० किमी अंतरावर आहे. जामतारा म्हणजे ऑनलाइन फसवणूक, सायबर क्राईम आणि फिशिंगशी संबंधित लोकांचा अड्डा आहे. जामतारा जिल्ह्यात जवळपास ११६१ गावं आहेत. शेती हेच प्रमुख उत्पन्नाचं साधन असलेल्या या परिसरातील शेती ही मुख्यत: पावसावर अवलंबून आहे. येथे जास्तीत जास्त भाताचं पीक घेतलं जातं. भारतातील जेवढे काही सायबर गुन्हे होतात त्यापैकी सर्वाधिक गुन्हे हे झारखंडमधील जामताराशी निगडित असतात.बॉक्साईटच्या खाणींसाठीही हा जिल्हा ओळखला जायचा. पण सध्या या जिल्ह्याची ओळख ही ऑनलाईन ठगांचा जिल्हा अशीच बनली आहे.
फिशिंग काय आहे?फिशिंग म्हणजे युजरनेम, पासवर्ड, क्रेडिट कार्ड डीटेल्स, बँक खात्याचे डीटेल्स यासारखी गुप्त माहिती अवैध मार्गानं मिळवणे. या मिळालेल्या माहितीचा दुरुपयोग करुन संबंधिताच्या खात्यावरुन पैसे गायब केले जातात.