"स्वतःची काळजी घ्या बाबा"; हातावर 'ते' शब्द लिहून लेकीने आयुष्य संपवलं! नेमकं काय घडलं?

आंध्र प्रदेशातील २४ वर्षीय शिक्षिका माधवीने खासगी फोटो व्हायरल करण्याच्या धमकीमुळे आत्महत्या केली. तिने हातावर वडिलांसाठी 'Take Care पापा' असा संदेश लिहिला होता.

बापासाठी आपली लेक हे त्याचं सर्वस्व असतं. पण याच बापाला 'स्वतःची काळजी घ्या' असं सांगून एका २४ वर्षीय तरुणीने मृत्यूला कवटाळल्याची हृदयद्रावक घटना आंध्र प्रदेशातील मार्कापुरम जिल्ह्यात समोर आली आहे. मानसिक छळ आणि खासगी फोटो सोशल मीडियावर व्हायरल करण्याच्या धमकीला कंटाळून माधवी नावाच्या तरुण शिक्षिकेने गळफास घेऊन आत्महत्या केली. आत्महत्येपूर्वी तिने आपल्या हाताच्या तळव्यावर 'Take Care पापा' असं लिहिलं होतं, जो तिचा शेवटचा संदेश ठरला.

नेमकं प्रकरण काय?

माधवी ही पामुरु येथील एका खाजगी शाळेत शिक्षिका म्हणून कार्यरत होती. नोकरीदरम्यान तिची ओळख नागुर भाषा नावाच्या तरुणाशी झाली. हळूहळू या ओळखीचे रूपांतर प्रेमात झाले. मात्र, काही काळाने माधवीला नागुरबद्दल एक धक्कादायक सत्य समजले. नागुर हा आधीच विवाहित असून त्याला मुलंही आहेत, हे समजताच माधवीने त्याच्यापासून अंतर राखण्यास सुरुवात केली.

खासगी फोटोंचा धाक आणि ब्लॅकमेलिंग

माधवीने नातं तोडल्यामुळे नागुर संतापला होता. त्याने माधवीला धमकावण्यास सुरुवात केली. दोघांच्या एकत्र असलेल्या वेळचे काही वैयक्तिक आणि आक्षेपार्ह फोटो सोशल मीडियावर व्हायरल करण्याची धमकी त्याने दिली. आपल्यामुळे वडिलांची आणि कुटुंबाची समाजात बदनामी होईल, या भीतीने माधवी प्रचंड मानसिक तणावाखाली होती. याच दबावातून तिने घरात कुणी नसताना टोकाचे पाऊल उचलले.

हातावर लिहिला शेवटचा संदेश

माधवीने आयुष्य संपवण्यापूर्वी आपल्या हाताच्या तळव्यावर 'Take Care पापा' असे लिहिले. आपल्या वडिलांवर तिचं किती प्रेम होतं आणि आपली बदनामी झाल्यावर त्यांना होणारा त्रास तिला बघवला नसता, हेच या शब्दांतून अधोरेखित होत आहे. तिने गळफास घेतल्याचे समजताच कुटुंबावर दुःखाचा डोंगर कोसळला आहे.

माधवीच्या मृत्यूला नागुर भाषा हाच जबाबदार असल्याचा आरोप तिच्या नातेवाईकांनी केला आहे. याप्रकरणी पोलिसांनी गुन्हा दाखल केला असून पुढील तपास सुरू आहे. एका सुशिक्षित मुलीला अशा प्रकारे आत्महत्येला प्रवृत्त करणाऱ्या नराधमाला कठोर शिक्षा व्हावी, अशी मागणी परिसरातून होत आहे.