मर्चंट नेव्हीमध्ये काम करणाऱ्या अधिकाऱ्याच्या पत्नीकडे पाहून अश्लील चाळे करण्याचा प्रकार कांदिवलीमध्ये घडला. याप्रकरणी समतानगर पोलिसांनी एका सुरक्षारक्षकाला अटक केल्याचे एका ज्येष्ठ अधिकाऱ्याने सांगितले. पीडित महिलाही कांदिवली पूर्वच्या ठाकूर व्हिलेज येथे राहाते. त्या ११ वर्षांपासून एक एनजीओ चालवत असून भटक्या कुत्र्यांना खायला द्यायचे काम करतात.
१८ डिसेंबर रोजी रात्री त्यांच्या एनजीओमध्ये काम करणाऱ्या कर्मचाऱ्याचा त्यांना फोन आला. ज्याने त्यांना कळवले की, कांदिवली पूर्व परिसरात असलेल्या जानुपाडा येथे पांडे कंपाऊंडच्या समोर एक इसम नग्न अवस्थेत असून तो एका कुत्र्याला त्रास देत आहे. तिथे धाव घेतल्यानंतर सिक्युरिटी गार्डचा युनिफॉर्म घातलेला एकजण विवस्त्र अवस्थेत दिसला. तो कुत्र्याला दगड मारत होता. महिलेने त्याला हटकले. तेव्हा त्याने महिलेकडे पाहत अश्लील चाळे केले. दरम्यान, चौकशीत त्याने त्याचे नाव भूपेश सिंग असल्याचे सांगितले. त्यानुसार पोलिस उपनिरीक्षक अक्षय वणवे यांनी त्याच्यावर गुन्हा दाखल केला.
आरोपीची सुटका-
आम्ही याप्रकरणी आरोपीला अटक केली असून त्याला कोर्टात हजर केले गेले. तेव्हा कोर्टाने जामिनावर त्याची मुक्तता केली असे समतानगर पोलिस ठाण्याचे वरिष्ठ पोलिस निरीक्षक प्रवीण राणे यांनी 'लोकमत' शी बोलताना सांगितले.