कल्याण: १६ वर्षीय अल्पवयीन मुलीवर गेल्या सहा महिन्यांपासून वडील आणि भावाकडून लैंगिक अत्याचार चालू असल्याचा धक्कादायक प्रकार कल्याण पूर्वेत शनिवारी उघडकीस आला. पिडीत मुलीने तीच्या मित्रांना चहा दिला म्हणून बापाने रागाच्या भरात तीला विवस्त्र करून मारले. मुलीने आरडा ओरड केल्याने तसेच तिच्या रडण्याच्या आवाजाने शेजारी राहणारे जमा झाले. यावेळी केलेल्या चौकशीत गेल्या सहा महिन्यांपासून सुरू असलेला लैंगिक अत्याचाराचा प्रकार उघडकीस आला.
तिच्या तक्रारीवरून कोळसेवाडी पोलिसांनी नराधम बापासह भावाला अटक केली आहे. पिडीत मुलीची आई सध्या कामानिमित्त गावी गेली आहे. तीला पिडीताने सुरू असलेल्या लैंगिक अत्याचाराची माहीती दिली होती. परंतू आईने मौन बाळगल्याने वडीलांचे आणि भावाचे अत्याचार सुरूच राहीले. सुरूवातीला तिच्या भावाने गैरकृत्यास सुरु वात केली. त्यानंतर वडीलांनीही तिच्यासोबत गैरकृत्य करायला सुरु वात केली. ऑगस्टपासून हे अत्याचार सुरू होते. हा प्रकार पिडीताकडून कळताच शेजा-यांनी मुलीला घेऊन कोळसेवाडी पोलिस ठाणे गाठले. कोळसेवाडी पोलिस ठाण्याचे वरिष्ठ पोलिस निरिक्षक बशीर शेख यांनी त्वरीत याची दखल घेतली.
याप्रकरणी गुन्हा दाखल करून घेत दोघा नराधमांना अटक करण्यात आली. याप्रकरणी पोक्सोसह विनयभंग आणि बलात्काराचा गुन्हा नोंदविण्यात आल्याची माहीती शेख यांनी दिली. दरम्यान वडील आणि भावाच्या नात्याला काळीमा फासणाऱ्या या प्रकाराने परिसरात एकच खळबळ उडाली आहे.