अंबरनाथ : अंबरनाथमध्येरेल्वे रुळांवर झोपून एका इसमाने आत्महत्या करण्याचा प्रयत्न केल्याची घटना घडली. मोटरमनने प्रसंगावधान राखत वेळीच लोकल थांबवल्यानं या इसमाचा जीव वाचला.
अंबरनाथ रेल्वे स्थानकाजवळच मंगळवारी सकाळी साडेनऊच्या सुमारास ही घटना घडली. कर्जतहुन मुंबईच्या दिशेनं जाणारी लोकल भरधाव वेगात अंबरनाथ स्थानकात येत असताना अचानक हाल्याचा पाडा परिसरात एक इसम लोकलसमोर रेल्वे रुळांवर झोपल्याचं मोटरमनच्या निदर्शनास आलं. त्यामुळं मोटरमनने इमर्जन्सी ब्रेक लावत या इसमापासून अवघ्या काही फुटांवर लोकल थांबवली. यानंतर काही प्रवासी, रेल्वे कर्मचारी आणि रेल्वे पोलिसांनी या इसमाला रेल्वे स्थानकात आणलं. या घटनेमुळे काही काळ मोठा गोंधळ उडाला. तसंच लोकलही काही मिनिटं खोळंबली. या इसमाचं वय अंदाजे ५० वर्ष असून त्याने आत्महत्येचा प्रयत्न नेमका का केला? याचा तपास सध्या रेल्वे पोलीस करतायत.