पिंपरी : नातेवाईक महिलेशी अनैतिक संबंध असल्याच्या संशयातून तरुणाचे अपहरण करून त्याला लोखंडी पाईपने मारहाण केल्याची घटना शिवाजी चौक, वाकड येथे घडली. याप्रकरणी ३० वर्षीय तरुणाने दिलेल्या फिर्यादीनुसार अजय राजेंद्र पवार ( रा. शिरुर, सध्या- गणपती माथा, वारजे माळवाडी पुणे), प्रमोद बाळू चासकर (रा. शिरुर, सध्या- वारजे माळवाडी, पुणे) यांच्यावर गुन्हा दाखल करण्यात आला आहे. पोलिसांनी प्रमोदला अटक केली असून, अजय पवार फरार आहे.
पोलिसांनी दिलेल्या माहितीनुसार, फिर्यादी हा अजय पवार यांच्याकडे तीन वर्षांपूर्वी कामाला होता. त्यामुळे आरोपीला त्याच्या नात्यातील महिलेशी अनैतिक संबंध असल्याचा संशय होता. त्या संशयातून त्याने आपला साथीदार प्रमोद याच्यासोबत फिर्यादीला वाकडमधील शिवाजी चौकातून जबरदस्तीने आपल्या चारचाकी गाडीत बसवले. त्यानंतर त्याला लोखंडी पाईप, बेल्टने मारहाण केली. तसेच त्याच्या गुप्तअंगावर, नाकावर, डोळ्यावर ओलीने स्प्रे मारला. एका ठिकाणी गाडी थांबवून पुन्हा मारहाण करताना फिर्यादीने आरोपीच्या हाताला हिसका देऊन पळ काढत पोलीस ठाणे गाठले.