माणुसकीला काळिमा! कामाच्या बहाण्याने राजस्थानला बोलावून महाराष्ट्रातील तरुणीवर १० दिवस सामूहिक बलात्कार

इव्हेंट मॅनेजमेंटच्या कामासाठी महाराष्ट्रातून बोलावलेल्या एका तरुणीला तब्बल १० दिवस एका फार्म हाऊसवर ओलीस ठेवून तिच्यावर सामूहिक बलात्कार करण्यात आल्याचा धक्कादायक प्रकार उघडकीस आला आहे.

राजस्थानच्या उदयपूर जिल्ह्यातून माणुसकीला काळिमा फासणारी एक अत्यंत संतापजनक घटना समोर आली आहे. इव्हेंट मॅनेजमेंटच्या कामासाठी महाराष्ट्रातून बोलावलेल्या एका तरुणीला तब्बल १० दिवस एका फार्म हाऊसवर ओलीस ठेवून तिच्यावर सामूहिक बलात्कार करण्यात आल्याचा धक्कादायक प्रकार उघडकीस आला आहे. या प्रकरणी पीडित तरुणीने सुखेर पोलीस ठाण्यात तक्रार दाखल केली असून पोलिसांनी मुख्य आरोपीसह दोघांना ताब्यात घेतले आहे.

कामाचे आमिष दाखवून बोलावले 

पीडित तरुणी महाराष्ट्रात इव्हेंट मॅनेजमेंटचे काम करते. तक्रारीनुसार, साधारण एक महिन्यापूर्वी उदयपूरमधील करण (नाव बदलले आहे) नावाच्या एका तरुणाने तिला फोन केला होता. उदयपूरमधील एका मोठ्या लग्नाच्या समारंभात इव्हेंटचे काम असल्याचे आमिष त्याने दाखवले. या कामासाठी तरुणी उदयपूरला पोहोचली असता, तिला एका सुनसान भागातील फार्म हाऊसवर नेण्यात आले.

अनैतिक कामासाठी टाकला दबाव 

पीडितेने सांगितले की, त्या फार्म हाऊसवर आधीच काही मुली होत्या. १० दिवसांनी काम सुरू होईल, असे सांगून तिला तिथेच थांबवण्यात आले. मात्र, अचानक आरोपी करणने तिला एका अनोळखी व्यक्तीसोबत शारीरिक संबंध ठेवण्यास सांगितले. या धक्कादायक मागणीला तरुणीने कडाडून विरोध केला. विरोध केल्यामुळे चिडलेल्या आरोपीने तिला एका खोलीत कोंडून ठेवले.

नशेत धुंद होऊन अत्याचार 

दोन दिवसांपूर्वी पीडित तरुणी खोलीत एकटी असताना आरोपी करण त्याच्या दोन मित्रांना घेऊन तिथे आला. तिघेही नशेत धुंद होते. त्यांनी पुन्हा तरुणीवर दबाव टाकला आणि नकार दिल्यावर तिघांनी मिळून तिच्यावर आळीपाळीने अत्याचार केले. एवढेच नाही तर, या प्रकाराबाबत कोणालाही सांगितल्यास जीवे मारण्याची धमकीही तिला देण्यात आली.

पोलीस कारवाई आणि तपास 

तरुणीने कशीबशी तिथून सुटका करून घेतली आणि थेट पोलीस अधीक्षक कार्यालय गाठून आपली आपबिती सांगितली. या घटनेचे गांभीर्य ओळखून अतिरिक्त पोलीस अधीक्षक उमेश ओझा आणि सुखेर पोलीस पथकाने तातडीने हालचाली करत मुख्य आरोपी करण आणि त्याच्या एका साथीदाराला ताब्यात घेतले आहे. तिसरा आरोपी अद्याप फरार असून पोलीस त्याचा शोध घेत आहेत.

"आम्ही मुख्य आरोपींना ताब्यात घेतले असून फरार आरोपीच्या शोधासाठी विशेष पथके तयार केली आहेत. पीडितेची वैद्यकीय तपासणी करण्यात आली असून वरिष्ठ अधिकारी स्वतः या प्रकरणावर लक्ष ठेवून आहेत," अशी माहिती पोलिसांनी दिली आहे. या घटनेमुळे महाराष्ट्रासह राजस्थानमध्येही तीव्र संताप व्यक्त केला जात आहे.