नालासोपारा : शहरात एका विवाहित तरुणीवर ॲसिड फेकून तिला विद्रूप करण्यात आल्याची धक्कादायक घटना येथे घडली आहे. या घटनेत तिच्यासोबत तिचा प्रियकरही जखमी झाला आहे. नालासोपाऱ्याच्या वाकणपाडा येथील अवधूत आश्रम रोड येथे राहणाऱ्या करिष्मा अली (२०) या विवाहित तरुणीने घाटकोपर येथील तौफिक इद्रिसीबरोबर प्रेमविवाह केला होता. मात्र, लग्नानंतर काही दिवसांनंतर त्यांच्यात बिनसल्यानंतर तौफिकला सोडचिठ्ठी देत कामरान अन्सारी या घाटकोपरमधील दुसऱ्या तरुणासोबत ‘लिव्ह ॲण्ड रिलेशनशिप’मध्ये ती राहत होती.
मात्र, काही दिवसांनंतर कामरान अन्सारीने लग्नाला नकार दिल्याने तिने त्याला सोडचिठ्ठी देत नालासोपाऱ्यातील कमाल खानसोबत तिसऱ्यांदा घरोबा केला. ही गोष्ट पहिला पती तौफिक व दुसरा प्रियकर कामरान यांना कळताच त्यांनी करिश्माला ‘मेरी नही तो किसी और की नही होने दुंगा, तुम्हे बरबाद कर दुंगा’ असे म्हणत धमकी दिली होती.
अखेर दोघा आरोपींनी संगनमताने रविवारी मध्यरात्री अडीचच्या सुमारास ती राहत असलेल्या नालासोपारा येथील घराची स्लाईडिंग खिडकी उघडत झोपलेल्या करिश्मा व कमालवर ॲसिड फेकून ते पळून गेले. दोघांनी ठरवून हे सर्व केल्याचे तपासात निष्पन्न झाले आहे. मात्र या घटनेत दोघेही जबर जखमी झाले असून, त्यांच्यावर सोपारा रुग्णालयात उपचार सुरू आहेत. हॉस्पिटलमधून एमएलसी आल्यानंतर मंगळवारी पेल्हार पोलीस पोलिसांनी या घटनेबाबत गुन्हा दाखल केला आहे.