मुंबई: कार्यक्रमात आलेल्या व्यक्तीला पाहून चिमुकली घाबरली. मुलीची अवस्था बघून कुटुंबीयांनी चौकशी करताच त्याने तिच्यावर दोन वेळा लैंगिक अत्याचार केल्याची धक्कादायक बाब सांताक्रूझमध्ये उघडकीस आली आहे. याप्रकरणी वाकोला पोलिसांनी विनोद मनोहर गाडे (४०) याला अटक केली आहे.
सांताक्रूझ परिसरात तक्रारदार यांच्या चाळीत पूजा असल्याने गाडे त्याठिकाणी आला. त्याला पाहून तक्रारदारांची ३ वर्षांची मुलगी घाबरली. महिलेने मुलीकडे याबाबत चौकशी करताच तिने सांगितलेल्या माहितीने कुटुंबीयांना धक्का बसला. गाडेने ६ जानेवारीपासून त्यांच्या मुलीवर दोन वेळा लैंगिक अत्याचार केला.
याबाबत महिलेने त्याच्याकडे जाब विचारताच, त्याने मुलीला उचलून नेण्याची धमकी दिली. कुटुंबीयांनी तत्काळ पोलिसांकडे धाव घेत तक्रार दिली. त्यानुसार, पोलिसांनी पोक्सो लैंगिक अत्याचाराच्या गुन्ह्यात त्याला अटक केली आहे.
सुरक्षारक्षकच निघाला भक्षक
गार्डनमध्ये खेळण्यासाठी लिफ्टमधून बाहेर पडत असताना सोसायटीच्या सुरक्षा रक्षकानेच ११ वर्षीय मुलीसोबत अश्लील चाळे केल्याची घटना कांदीवलीत समोर आली आहे. मुलीने घडलेला प्रकार आईला सांगताच त्यांनी याबाबत पोलिसांना माहिती दिली. त्यानुसार, समतानगर पोलिसांनी सुरक्षा रक्षक अशोक यादव (३०) याला पोक्सो अंतर्गत अटक केली आहे.