मुंबई - लालबाग परळ येथील वीणा जैन यांच्या हत्येप्रकरणी पोलिसांनी त्यांची मुलगी रिम्पल जैनला अटक केली आहे. सध्या न्यायालयाने तिला पोलीस कोठडी सुनावली असून पोलिसांकडून मृत्युप्रकरणाची सखोल चौकशी सुरू आहे. या चौकशीत पोलिसांना धक्कादायक माहिती समोर आली आहे. काहीही कारण नसताना आई वारंवार टोकायची. यामुळे ती अस्वस्थ झाली होती. अशात दुसरीकडे, तिच्या आईचा शिड्यांवरून खाली पडून मृत्यू झाल्याचे रिम्पलने पोलिसांना सांगितले. त्यामुळे, या प्रकरणात नवा ट्विस्ट आला आहे.
रिम्पलने चाळीखाली असलेल्या मेडिकलमधून काही दिवसांपूर्वी फिनाइल आणि काही वस्तू मागवल्या होत्या. त्यामुळे मेडिकलवाल्याचीही पोलिसांनी चौकशी केली आहे. त्याचप्रमाणे २७ डिसेंबरला आई पहिल्या मजल्यावरून पडली असे रिम्पलने पोलिसांना सांगितले. त्यावेळी चाळीखाली असलेल्या फ्लेव्हर्स ऑफ चायनीज या हॉटेलमध्ये काम करणाऱ्या हबीब आणि रोहित या दोन मुलांच्या मदतीने रिम्पलने आईला घरी आणले. त्याच दिवशी वीणा जैन यांचा मृत्यू झाला असावा असा पोलिसांचा अंदाज आहे. आता, रिम्पलनेही शिडीवरुन पडल्यानेच आईचा मृत्यू झाल्याचं पोलिसांना सांगितलं आहे.
काहीही कारण नसताना आई वारंवार मला टोकायची. त्यामुळे मी अस्वस्थ झाली होती. अशात आईचा शिड्यांवरून खाली पडून मृत्यू झाला. तेव्हा आरोपाच्या भीतीने आईच्या मृतदेहाचे ५ तुकडे केल्याचा खुलासा रिम्पलने पोलिसांच्या चौकशीत केला आहे. दरम्यान, शवविच्छेदन अहवालाची पोलिसांना प्रतीक्षा असून, त्यानंतरच वीणा यांची हत्या झाली की त्या पहिल्या मजल्यावरून पडून मृत्यूमुखी पडल्या, याची ठोस माहिती समोर येईल. दरम्यान, काळाचौकी पोलिसांनी घटनास्थळी जाऊन पुन्हा चौकशी केली.
पोलिसांकडून सँडविचवाल्याचीही चौकशी
काळाचौकी पोलिसांकडून अमजद अली उर्फ बॉबीकडेही चौकशी सुरू आहे. तो लालबागमध्ये सँडविच विकण्याचे काम करायचा. रिम्पल आणि तिची आई त्याच्याकडून नेहमी सँडविच घ्यायच्या. त्यावेळी तिची अमजदशी ओळख झाल्याची माहिती तिने पोलिसांना दिली. तो ७ जानेवारीला सँडविच स्टॉल बंद करून लखनौनजीकच्या आपल्या मूळ गावी गेला होता. तेव्हापासून तो रिम्पलच्या संपर्कात होता. त्यांचे चॅटिंग सुरू होते. तसेच, माटुंगा येथील एका चायनीजच्या दुकानात काम करणाऱ्या तरुणाच्याही ती सतत संपर्कात होती. या तरुणाचीही पोलिस चौकशी करत आहेत.