हार्ट अटॅकचं नाटक रचलं, पण एका संशयाने उलगडा झाला; दत्तक घेऊन ज्याचा सांभाळ केला त्याने आईला संपवलं!

शिक्षण विभागात प्रथम श्रेणी सहाय्यक म्हणून कार्यरत असलेल्या जयलक्ष्मी यांना त्यांच्याच मुलाने संपवल्याचे धक्कादायक प्रकरण समोर आले आहे.

रक्ताच्या नात्यावरचा विश्वास उडावा, अशी एक भयंकर घटना तुमकुरु जिल्ह्यातील जोगीहल्ली गावात उघडकीस आली आहे. शिक्षण विभागात प्रथम श्रेणी सहाय्यक म्हणून कार्यरत असलेल्या जयलक्ष्मी यांची त्यांच्याच सख्या बहिणीने आणि दत्तक पुत्राने गळा आवळून हत्या केली. धक्कादायक म्हणजे, या दोघांनीही ही हत्या नसून 'हार्ट अटॅक' असल्याचे भासवून पुरावे नष्ट करण्याचा प्रयत्न केला, मात्र पोलिसांच्या चौकस नजरेतून ते सुटू शकले नाहीत.

'लोकमत महाराष्ट्रीयन ऑफ द इयर' कोण?... क्लिक करून आपलं मत नोंदवा!

काय आहे संपूर्ण प्रकरण?

जयलक्ष्मी या बीईओ कार्यालयात सरकारी नोकरीला होत्या. त्यांच्या पतीचे २० वर्षांपूर्वीच निधन झाले होते. त्यांना स्वतःचं अपत्य नसल्यामुळे त्यांनी आपली सख्खी बहीण अनुसूया हिचा मुलगा चंद्रशेखर याला दत्तक घेतले होते. त्याला त्यांनी पोटच्या मुलाप्रमाणे लहानाचं मोठं केलं. मात्र, गेल्या काही महिन्यांपासून घरात सुरू असलेल्या वादाचा शेवट इतक्या भीषण हत्येत होईल, असं कोणालाही वाटलं नव्हतं.

हार्ट अटॅकचा बनाव अन् पोलिसांचा संशय

जयलक्ष्मी यांचा मृत्यू झाला तेव्हा आरोपींनी आरडाओरडा करून हा हृदयविकाराचा झटका असल्याचा बनाव रचला. अंत्यसंस्काराची तयारीही सुरू झाली होती. मात्र, जयलक्ष्मी यांचे निकटवर्तीय श्रीनिवास यांना या मृत्यूबाबत संशय आला. त्यांनी तातडीने चिक्कनायकनहल्ली पोलीस ठाण्यात तक्रार दिली. पोलिसांनी घटनास्थळी धाव घेत अंत्यसंस्कार थांबवले आणि मृतदेह शवविच्छेदनासाठी पाठवला. पोस्टमार्टम रिपोर्टमध्ये गळा आवळल्यामुळे मृत्यू झाल्याचे स्पष्ट होताच पोलिसांनी बहीण आणि मुलाला ताब्यात घेतले.

हत्येमागचं नेमकं कारण काय?

पोलीस तपासात समोर आलेले कारण अंगावर शहारे आणणारे आहे. जयलक्ष्मी यांचे श्रीनिवास यांच्याशी जवळचे संबंध होते आणि त्या त्यांच्यासोबत राहत होत्या. मात्र, आठ महिन्यांपूर्वी बहीण अनुसूया आणि मुलगा चंद्रशेखर हे जयलक्ष्मी यांच्या घरी राहायला आले. त्यांनी श्रीनिवास यांना घरातून हाकलून दिले. या त्रासाला कंटाळून जयलक्ष्मी यांनी लवकरच दुसरे घर घेऊन वेगळे राहण्याचा निर्णय घेतला होता.

आपल्या हातातून संपत्ती जाईल आणि वेगळे राहिल्यावर जयलक्ष्मी यांच्या सरकारी नोकरीचा वारसाहक्क मिळणार नाही, या भीतीने बहीण-भावाच्या जोडीने रात्रीच्या सुमारास जयलक्ष्मी यांचा गळा आवळून काटा काढला.

नात्याचा निर्घृण शेवट

पोलिसांनी अनुसूया आणि चंद्रशेखर या दोन्ही आरोपींना बेड्या ठोकल्या आहेत. ज्या मावशीने आईच्या मायेने वाढवले, तिच्याच मृत्यूची सुपारी घेणाऱ्या या मुलाच्या कृत्याने संपूर्ण कर्नाटक हादरले आहे. आर्थिक लाभ आणि सरकारी नोकरीच्या हव्यासापोटी हे कृत्य केल्याची कबुली आरोपींनी दिली आहे.