फिल्मी स्टाईल लावला गंडा, ग्राहकांच्या सोन्याचा गैरवापर; बँक मॅनेजरनं जमवलं कोट्यवधीचं घबाड

बँकेच्या तक्रारीवरून पोलिसांनी तत्कालीन बँक मॅनेजर अमित कुमार, अनंत चौधरी आणि बँकेचे अधिकारी संतोष कुमार यांच्याविरोधात गुन्हा दाखल करून तपास सुरू केला.

राजस्थानच्या नवलगड जिल्ह्यातील पंजाब नॅशनल बँकेतील ६.५० कोटींचा गोल्ड घोटाळा उघडकीस आला आहे. हा घोटाळा एखाद्या सिनेमातील कथानकाप्रमाणे हळूहळू उघडकीस आला. त्यात बँक मॅनेजर अमित कुमार जांगिडने केवळ ग्राहकांचा विश्वासघात केला नाही तर त्यांच्या सोन्याचा गैरवापर करून स्वत:कडे घबाड जमावले आणि त्याच्या खासगी संपत्तीत कोट्यवधीचे साम्राज्य उभे केले.

या गोल्ड घोटाळ्यातून आरोपी बँक मॅनेजरने महागडी जमीन खरेदी केली. डेअरी प्लांट उभारले. मात्र हा घोटाळा उघडकीस आल्यानंतर बँकेच्या शेकडो ग्राहकांमध्ये चिंता पसरली आहे. ज्यांनी कर्जाच्या बदल्यात बँकेत सोने गहाण ठेवले आहे. माहितीनुसार, बँकेच्या स्ट्राँग रुममध्ये कर्ज घेतलेल्या ग्राहकांचे सोने सुरक्षित ठेवण्यात आले होते. तपासात यातील ७३ पाकिटात खऱ्या सोन्याऐवजी बनावट खोटे सोने ठेवले होते. तर ३ पाकिटांमधील सोन्याचे वजन कमी आढळले तेव्हा हा संपूर्ण प्रकार समोर आला.

बँकेच्या सुरुवातीच्या तपासात एकूण ४ हजार १९८ ग्रॅम सोने कमी आढळले. त्याचे बाजारभाव जवळफास ६.५० कोटी इतके होते. या चोरीचा पोलिसांकडून सखोल तपास सुरू आहे. बँकेच्या स्ट्राँग रूमची चावी दोन जणांकडे ठेवली जाते. ज्याची संयुक्त जबाबदारी तत्कालीन बँकेचे वरिष्ठ मॅनेजर अमित कुमार आणि डेप्युटी मॅनेजर अनंत प्रकाश चौधरी यांच्याकडे होती. २८ फेब्रुवारीला जेव्हा गोल्ड स्ट्राँग रुमचा ताबा डेप्युटी मॅनेजर सीमा महला यांच्याकडे सोपवला जात होता. त्यावेळी झालेल्या तपासात सोन्याच्या पाकिटांसोबत छेडछाड झाल्याचे उघड झाले. त्यात तपास केला असता बँक मॅनेजर अमित कुमार यांची भूमिका संशयास्पद आढळली. 

बँकेच्या तक्रारीवरून पोलिसांनी तत्कालीन बँक मॅनेजर अमित कुमार, अनंत चौधरी आणि बँकेचे अधिकारी संतोष कुमार यांच्याविरोधात गुन्हा दाखल करून तपास सुरू केला. पोलिसांच्या तपासात बँकेचे मॅनेजर अमित कुमार यांनी मागील काही वर्षात कोट्यवधीची जमीन खरेदी केली, ज्यातील एका जमिनीवर डेअरी उभारल्याचे निष्पन्न झाले. त्याशिवाय वेगवेगळ्या ठिकाणी आणखी काही संपत्तीही खरेदी केली होती. बँकेच्या तपासात अनेक बनावट गोल्ड लोन दिल्याचेही समोर आले. ज्यांच्या नावावर कागदावर कर्ज दाखवण्यात आले पण प्रत्यक्षात ती माणसेच नाही असं उघड झाले. सोबतच सरकारी योजनेच्या नावावर बनावट कर्जवाटप प्रकारही उघडकीस आले आहेत. बँक घोटाळ्यातील एकूण आकडा समोर आला नाही. अद्याप पोलीस या संपूर्ण प्रकरणाची चौकशी करत आहेत. त्यामुळे फसवणुकीचा आकडा वाढण्याची शक्यता आहे.