आग्रा - शहरातील एका मुलीसोबत अमानुष कृत्य केल्याची घटना समोर आली आहे. शुक्रवारी सकाळी एक मुलगी रस्त्याच्या कडेला बेशुद्धावस्थेत आढळली. माहिती मिळताच कुटुंबीय आणि पोलीस घटनास्थळी पोहोचले. घाईघाईत मुलीला रुग्णालयात दाखल करण्यात आले. तिथे तिच्यावर उपचार सुरू आहेत. मात्र, ती अद्याप बोलण्याच्या स्थितीत नाहीत. नराधमांनी तिच्यावर सामूहिक बलात्कार केल्याचा आरोप पीडितेच्या भावाने केला आहे.
या मुलीचे हातपाय तोडून आणि तिला जंगलात फरफटत नेले. गळा दाबून जिवे मारण्याचा प्रयत्न केला. मुलगी मृत समजून आरोपी फरार झाले. ती रात्रभर जंगलात त्याच अवस्थेत पडून राहिली. जरा भान आल्यावर ती कशीतरी जंगलातून रेंगाळत रस्त्यावर पोहोचली. पोलिसांनी भावाच्या तक्रारीवरून बलात्काराचा FIR दाखल केला आहे.
नातेवाईकांनी दिलेल्या माहितीनुसार, गुरुवारी दुपारी मुलगी मावशीच्या घरी जायला निघाली होती. परंतु तिथे पोहचली नाही. ती होळी खेळत असावी असं कुटुंबाला वाटलं. संध्याकाळी ६ वाजले तरी मुलगी घरी परतली नसल्याने आई वडिलांना चिंता लागली. ती मावशीच्या घरी पोहचली नव्हती त्यामुळे तिचा शोध घेण्यास सुरुवात झाली. शुक्रवारी सकाळी एका व्यक्तीला जंगलाशेजारील रस्त्यावर मुलगी जखमी अवस्थेत पडल्याचं दिसून आले. त्याने ही माहिती पोलिसांना दिली.
जेव्हा आम्ही घटनास्थळी पोहचलो तेव्हा बहिणीची अवस्था खूप बिकट होती. २ मिनिटे ती शुद्धीवर आली त्यानंतर पुन्हा बेशुद्ध झाली. शरीरावर कपडे नव्हते. डोळ्यातून रक्त वाहत होते. गँगरेप करणाऱ्यांनी तिच्या शरीराचे लचके तोडले होते. त्यानंतर तिला जंगलात फरफटत नेले. पाठ आणि डोक्याला गंभीर दुखापत झाली होती. ती मेल्याचं समजून आरोपींनी तिला जंगलात फेकले. रात्रभर ती तिथेच पडली होती. सकाळी शुद्ध आली तेव्हा ती कशीबशी रस्त्यापर्यंत पोहचली असं पीडितेच्या भावाने म्हटलं.
दरम्यान, मुलीच्या शरीरावर अनेक जखमा आहेत. तिला निर्दयीपणे मारहाण करण्यात आली. भावाच्या तक्रारीवरून आम्ही गुन्हा दाखल करून घेतला आहे. पीडितेचा जबाब नोंदवण्याचा प्रयत्न सुरू आहे जेणेकरून आरोपींची ओळख पटू शकेल. अद्याप पीडिता काहीही बोलण्याच्या मनस्थितीत नाही. तिच्यावर सध्या उपचार सुरू आहेत. तिची तब्येत सुधारल्यानंतर जबाब नोंदवला जाईल अशी माहिती पोलीस अधिकारी आनंद कुमार शाही यांनी दिली.