नालासोपारा - नालासोपारा पश्चिमेकडील सोपारा गावात शनिवारी संध्याकाळी एका इमारतीमध्ये राहणाऱ्या 2 वर्षे 4 महिन्याच्या मुलावर कोणीतरी चाकूच्या सहाय्याने धारधार हत्याराने गळ्यावर वार केली असल्याची धक्कादायक घटना घडली आहे. गंभीर जखमी अवस्थेत असलेल्या मुलावर जवळच्या रुग्णालयात अतिदक्षता विभागात उपचार सुरू असून नालासोपारा पोलिसांनी हत्येचा प्रयत्न हा गुन्हा दाखल करून पुढील तपास करत आहे.
सोपारा गावातील नभा ऍव्हेन्यू इमारतीच्या रूम नंबर ए/02 मध्ये सैय्यद परिवार राहतात. शनिवारी संध्याकाळी 7 वाजण्याच्या सुमारास सैय्यद यांच्या घरी धार्मिक कार्यक्रम सुरू होता. हमजा सैय्यद हा त्यांचा 2 वर्षे 4 महिन्यांचा मुलगा घराबाहेर खेळत होता. तो दुसऱ्या आणि तिसऱ्या मजल्याच्या मधील स्टेअर केसमध्ये गेला असता कोणीतरी त्याच्या गळ्यावर कसल्या तरी धारधार हत्याराने वार करून गंभीर जखमी केले. रक्तबंबाळ झालेल्या हमजाला जवळच्या बदर हॉस्पिटलमध्ये उपचारासाठी भर्ती केले असून त्याला अतिदक्षता विभागात ठेवले आहे. हमजाच्या गळ्यावर 10 ते 12 टाके पडले असून आता तो व्यवस्थित असल्याचे तपास अधिकारी व पोलीस उपनिरीक्षक जगदीश नाईक यांनी लोकमतला बोलताना सांगितले आहे.
सोपारा गावातील एका इमारतीमध्ये राहणाऱ्या 2 वर्षे 4 महिन्याच्या मुलावर कोणीतरी धारदार हत्याराने गळ्यावर वार केले आहे. अज्ञात आरोपी विरोधात गुन्हा दाखल केला असून हा हल्ला कोणी व का केला याचा तपास करत आहे. - वसंत लब्दे, वरिष्ठ पोलीस निरीक्षक, नालासोपारा पोलीस ठाणे