लंडन – इंग्लंडमध्ये एका अल्पवयीन मुलीवर हजारोंच्या गर्दीत बलात्कार झाल्याची धक्कादायक घटना घडली आहे. आश्चर्य म्हणजे याची भनकही कुणाला लागली नाही. या घटनेचा कुणीही साक्षीदार नाही. पीडित मुलगी तिच्या मित्रांसह फिरण्यासाठी समुद्रकिनारी गेली होती. त्याचठिकाणी एका मुलानं तिला वासनेचा शिकार बनवलं. आरोपीनं पाण्यात मुलीवर बलात्कार केल्याचं उघड झालं.
पोलीस सध्या या घटनेचा तपास करत असून १७ वर्षीय युवकाचा शोध सुरू आहे. तो पाकिस्तानी असल्याचा संशय पोलिसांना आहे. ‘द सन’च्या रिपोर्टनुसार १५ वर्षीय पीडित मुलगी १८ जुलै रोजी इंग्लंडच्या बोर्नमाऊथ (Bournemouth) शहरातील एका समुद्र किनारी मित्रांसोबत फिरण्यासाठी गेली होती. त्याठिकाणी आरोपीनं तिला गाठलं. तो पाकिस्तानी असल्याचं दिसून येत होतं. आरोपी पीडित मुलीला बोलण्याच्या जाळ्यात ओढून तिला पाण्यात नेलं. त्यानंतर पाण्यात काही अंतरावर पोहचल्यानंतर आरोपीनं पीडित मुलीवर बलात्कार केला.
दिवसाढवळ्या समुद्र किनारी असणाऱ्या इतक्या गर्दीसमोर ही घटना घडली परंतु कुणालाही या घटनेची साधी भनकही लागली नाही. पोलिसांच्या माहितीनुसार, आरोपीनं मुलीला सांगितलं की, तो १७ वर्षाचा आहे आणि बर्मिंघम येथे राहायला आहे. त्याच्या बोलण्यावरून तो पाकिस्तानी वाटत होता. दुपारी ३ च्या सुमारास ही घटना घडली. त्यावेळी समुद्र किनारी शेकडो लोकं होती. या आरोपीला पकडण्यासाठी पोलीस आता लोकांची मदत घेत आहेत. मेजर क्राईम इन्वेस्टिगेशन टीमचे डिटेक्टिव पोलीस निरीक्षक वेन सीमोर म्हणाले की, घटनेच्या दिवशी बीचवर मोठ्या संख्येने लोक उपस्थित होते. त्यामुळे जर कोणाकडे आरोपीबाबत काही माहिती असेल तर त्यांनी पुढे येऊन पोलिसांची मदत करावी असं आवाहन त्यांनी केले.
आरोपीच्या शोधात पोलीस आसपासच्या दुकानदारांचीही चौकशी करत आहेत. त्याशिवाय त्या दिवशी समुद्र किनारी घेतलेल्या फोटोंचाही शोध घेत आहेत. ज्यामुळे आरोपीचा चेहरा समोर येऊ शकेल. परंतु अद्याप पोलिसांना यश आलं नाही. पीडिताने तिच्या जबाबात म्हटलंय की, घटना घडल्यानंतर आरोपी मुलगा त्याठिकाणाहून गायब झाला. कुठेही तो दिसला नाही. त्यानंतर मी पाण्याच्या बाहेर येऊन घडलेला प्रसंग मित्रांना सांगितला पण कुणालाही विश्वास बसला नाही.