आठशे दलघमीने वाढला जलसाठा

औरंगाबाद : परतीच्या पावसामुळे आठवडाभरात मराठवाड्यातील मोठ्या धरणांमधील जलसाठा तब्बल आठशे दलघमीने वाढला आहे. विभागातील मोठ्या धरणांमध्ये सध्या ६० टक्के (३०३७ दलघमी) उपयुक्त साठा झाला आहे. या काळात माजलगाव धरणात सर्वाधिक ३१२ दलघमी पाणी आले आहे.आठवडाभरापूर्वी जायकवाडी वगळता मराठवाड्यात इतर दहा मोठ्या प्रकल्पांमध्ये अत्यल्प जलसाठा होता. त्यातही माजलगाव आणि मांजरा या दोन धरणांमध्ये शून्य टक्के साठा होता. मात्र सलग चार ते पाच दिवस झालेल्या पावसामुळे विभागातील जलसाठा झपाट्याने वाढला आहे. माजलगाव धरणात तब्बल ३१२ दलघमी पाणी आले आहे. सध्या माजलगाव धरण शंभर टक्के भरले आहे. त्याचप्रमाणे मांजरा धरणातही १७१ दलघमी पाणी आले आहे. त्यामुळे हे धरण पूर्णपणे भरले आहे. या दोन्ही धरणांच्या सांडव्यातून सध्या विसर्ग करण्यात येत आहे. यापाठोपाठ निम्न मनार धरणातही १०० दलघमी, तेरणा धरणात ४२ दलघमी, सिना कोळेगाव धरणात ४६ दलघमी पाणी आले आहे. तसेच जायकवाडी प्रकल्पात १०५ दलघमी, येलदरी प्रकल्पात २३ दलघमी आणि सिद्धेश्वर प्रकल्पातही ७ दलघमी पाणी वाढले आहे. मराठवाड्यातील अकरा मोठ्या प्रकल्पांच्या उपयुक्त जलसाठ्याची एकूण क्षमता ५१४३ दलघमी इतकी आहे. आता या धरणांमध्ये ३०३७ दलघमी पाणीसाठा झाला आहे. मोठ्या प्रकल्पांप्रमाणेच लघु आणि मध्यम प्रकल्पातील जलसाठ्यातही भरीव वाढ झाली आहे. सध्या मराठवाड्यातील ७५ मध्यम प्रकल्पांमध्ये सरासरी ७२ टक्के जलसाठा झाला आहे, तर ७३२ लघु प्रकल्पांमध्ये सरासरी ६९ टक्के जलसाठा आहे. याशिवाय गोदावरी नदीवरील ११ बंधारेही ६२ टक्के भरले आहेत. तेरणा, मांजरा व रेणा नदीवरील २१ बंधाऱ्यांमध्येही ७५ टक्के पाणीसाठा झाल्याचे जलसंपदा विभागाच्या अधिकाऱ्यांनी सांगितले.