एकाच कुटुंबातील तिघे जागीच ठार

वाळूज महानगर : भरधाव वेगाने औरंगाबादहून नगरकडे चाललेली कार दुभाजकावर धडकून विरुद्ध दिशेने येणार्‍या कंटेनरवर आदळल्याने तिघे ठार झाल्याची घटना आज सायंकाळी जिकठाण फाट्यावर घडली. याविषयी अधिक माहिती अशी की, विष्णू गोविंद शेदाळे (४७, रा. अचानकवाडी, ता. जि. अहमदनगर) हे कुटुंबासह आज २९ मे रोजी कार क्रमांक एमएच-१६, आर-१२४२ मध्ये बसून औरंगाबादहून अहमदनगरकडे भरधाव वेगाने चालले होते. अतिशय वेगाने कार नगरकडे जात असताना जिकठाण फाट्यावर कारचालक विष्णू शेदाळे यांचे कारवरील नियंत्रण सुटल्यामुळे कार दुभाजकावर आदळली. तीन ते चार पलट्या घेऊन ती नगरकडून औरंगाबादकडे येणार्‍या कंटेनर क्रमांक एमएच-१८, एए-०७५० वर धडकली. या भीषण अपघातात कारमधील विष्णू शेदाळे, पत्नी अलका शेदाळे (४0) व मुलगी विशाखा शेदाळे (१८) हे तिघे गंभीर जखमी झाले होते. हा भीषण अपघात बघताच या मार्गावरून ये-जा करणार्‍या वाहनधारकांनी अपघातस्थळी धाव घेऊन या घटनेची माहिती वाळूज पोलिसांनी दिली. या अपघाताची माहिती मिळताच पोलीस निरीक्षक अशोक कदम यांच्या मार्गदर्शनाखाली फौजदार संजय निकुंभ, सहायक फौजदार ढोले, पोहेकॉ. रेखा चांदे, पोकॉ. संजय वामने आदींनी घटनास्थळी धाव घेऊन जखमींना रुग्णवाहिकेतून उपचारासाठी शासकीय रुग्णालयाकडे रवाना केले. रुग्णालयात दाखल करण्यापूर्वी रस्त्यातच तिघा जखमींचा मृत्यू झाला. फौजदार संजय निकम पुढील तपास करीत आहेत. थांबलेल्या दुचाकीस्वाराला कारची धडक हा भीषण अपघात झाल्यामुळे अपघातस्थळी दुचाकीस्वार प्रल्हाद भीमराव आखडे (५१, रा. चेंदाई, ता. भोकरदान, जि. जालना) हे थांबून निरीक्षण करीत असताना नगरहून भरधाव वेगाने येणारी कार क्रमांक एमएच-२० बीएन-६७८१ ने दुचाकीला जोराची धडक दिली. या अपघातात दुचाकीस्वार गंभीर जखमी झाले आहेत. नशीब बलवत्तर म्हणून अपघातस्थळी जमा झालेले वाहनधारक तसेच पोहेकॉ. रेखा चांदे व कर्मचारी घटनास्थळावरून प्रसंगावधान राखत लगबगीने दूर गेल्यामुळे थोडक्यात बचावले. या अपघातानंतर कारचालक पळून जाण्याच्या तयारीत असताना वाळूज पोलिसांनी त्यास पकडून चोप दिला. त्याच कारमध्ये जखमी दुचाकीस्वारास उपचारासाठी वाळूजच्या खाजगी रुग्णालयात दाखल केले.